Байбивхьунни Гъумук цIусса детсад буллай

Байбивхьунни Гъумук цIусса детсад буллай

Жу уттинингу таманссалийла бусарду Гъумук бан ккаккан бувну бушиврия ттизаманнул тIалавшиннардацIун бавкьусса 120 оьрчIансса детсад. Вана проект чулийн бувккун. Вай гьантрай байбивхьунни гьану буклай. Ттизаманнул къулайшиннардал дузалсса, мюхчансса, гъилисса ва чаннасса кIира зивулийсса детсадрал къатри дан ккаккан дурну дур республикалул инвестицион программалул лагрулий.

Школалийн гьаннинсса кIулшиву дулаврил идаралий бикIан тIий бур пищеблок, медкабинет, физкультуралул ва музыкалул дарсру дихьлансса заллу, логопедический ва методический классру.
Лакрал райондалул бакIчи Юсуп МахIаммадовлул кIицI лавгсса куццуй, республикалул бакI дургьуми хIарачат буллай бур шяраваллал кIанттурдай ялапар хъанахъиминнал оьрмулул шартIру къулай дан. «Шяраваллаву школалийн гьаннинсса кIулшиву дулаву хьхьичIуннай даву хьхьичIунсса ххуллуну ккаклай ур билаятрал Президент. Проектрайн бувну, цIусса къатраву ххал диргьуну дур оьрчIру тарбия баврин ва школалийн хIадур баврин аьркинсса гьарцагу шартIру. Агьамсса къулагъас дурну дур оьрчIал мюхчаншиву дуруччаврих», – увкунни райондалул бакIчинал.
ЦIусса детсадрал къатри дан тIий бур цIусса школалия арх бакъа, гьарза-гьартасса кIанттай.

Читайте также: