Январь зурул 19-нний ЦIуссалакрал райондалул администрациялул ва цаймигу структурардал зузалтрал бунни COVID-19 дусса-дакъасса исват буллалисса ПЦР тестру. Райондалул администрациялул зузалтран тестру бан бувкIун бия ЦIуссалакрал райондалул хъунмур азарханалул медиктал.
Тестирдал хIасиллу дунни 15 минутIрал мутталий. Ва кьини аьмну ПЦР-тестру бунни 50 инсаннал. Вайннава 3 инсаннай ковид душиву исват хьунни. Тестирдайн бувну ковид душиву аьлтту хьусса шамагу инсан гьан унни райондалул азарханалийн, хъирив лавну, цалла цIуллу-сагъшиву ххал дигьин. Шиккува кIицI лаган, ЦIуссалакрал райондалул администрациялул цинявппагу зузалтрал бувссар коронавирусрая буруччаву мурадрайсса вакцинартту.
ЦIанасса чIумал агьалинан кIулну бикIан аьркинссар 6 барз лавгун махъ антителарду чан хъанахъишиву ва, мунийн бувну, цIуницIа вакцинартту буллан аьркиншиву.
Му бакъассагу, ЦIуссалакрал райондалий цIанасса ппурттуву идарарттайн бухлахисса кIанттурдай гужлан дуллан бивкIунни маскарду лаххаврил режим ва цаймигу ковидрая буруччаву мурадрайсса тIалавшиннарду.
Цал уттигу агьалинан дакIнийн бутанну, коронавирусрал инфекция ппив хьун къаритаву мурадрай хIасул бувсса Оператив штабрал январь зурул 15-нний хьусса батIаврий Республикалул БакIчи Сергей Меликовлул тIалав дуршиву COVID-19 азарданул инфекция ппив хьун къаритаву мурадрайсса чаранну гужлан буллан аьркиншиву.
