Дагъусттаннал Минздраврал штатрай акъасса пульмонолог Кьубатай Масуевлул журналистътурахь бувсунни «омикрон» коронавирусрал махъра-махъмур мутация дакъашиву, ванил хъирив цаймигу мутацияртту ялун личин бюхъайшиву. Ванал бувчIин бунни вирусру даиман даххана хъанай душиву. Мяйжанссар, цукунсса иш-тагьар дикIанссарив, цукунсса журалул дахханашивуртту хъананссарив къакIулну бур хIакинтуран-пишакартурангу.
Ванал ялагу бувсунни вирусрал цIусса штаммрал хьхьарасса иммунитетрайн гьужум бувайшиву ва ялагу цукссагу хIаллай оьттуву личIайшиву, цама инсаннал оьттувун багьайхту, вирусрал мутация хъанай дайдишайшиву. Декабрь зурул ахирданий Роспотребнадзорданул баян бувна жучIава, республикалий, «омикрон» азар лархъсса инсан акъашиву. Масуевлул бувсунни цIусса шинал байрандалул гьантри къуртал шайхту, азарханардайн букIлакIисса къашайшалтрал симптомру цIусса штаммраха лархьхьусса душиву. Вайва гьантрай Каспийскалий «омикрон» азар дирсса инсан ушивугу баян бунни Минздраврал.
ХьхьичIва Гамалеял цIанийсса эпидемиологиялул ва микробиологиялул элмийсса институтрал директор Александр Гинцбурглул баян бувна «Спутник V» вакцинанул коронавирусрал омикрон-штаммрая буруччинтIишиву.
