Дагъусттаннал БакIчинал лаизаву

Январьданул 11-нний Дагъусттаннал БакIчи Сергей Меликовлул дунни гьашинусса шинал региондалий коронавирусрал инфекциялущалсса талатаврил Оператив штабрал батIаву.

Республикалул каялувчинал бусаврийну, байрандалул гьантрай региондалий аьмну бювхъуну бур щаллу дуван эпидемиологиялул тагьарданул цалий дацIаву. Сергей Меликовлул барчаллагь кунни ми хIасиллу хьун дурсса духтуртурахь, Роспотребнадзорданул ва МВД-лул зузалтрахь. Хъин чулий ккарккунни мукунна му чулухуннай дурсса муниципалитетирттал давурттугу.
Сергей Меликовлул тIиму­нийну, цалчинмур ххуттайва бур уттигу азарханардай къашайшалт кьамул баврил масъала. ХIакьину республикалул азарханардаву хIадур бувну бур сайки 2000 койка. Луртандалий бур 22% койкардал. «Мукунсса луртан жунна аьркинссар сахла дуван», – кунни Республикалул каялувчинал.
«Тестру даврил чулухагу жулла ахттар бавурттал лагрурду хъуни хъанай дур. ХIакьинусса кьини республикалий дянивсса ккаккия ккаллину дур 100 азара инсаннан 316 ахттар баврин. Му чулухасса тIалавшинну биттур дуллай буру. Ми тIалавшинну ттинияр тихуннайгу бартдигьланни аьркинсса», – кунни субъектрал каялувчинал.
Дагъусттаннал Роспотребнадзорданул управлениялул каялувчи Николай Павловлул бусаврийну, хIакьинусса кьини республикалий сияхIрайн лавсун ур коронавирусрал къашавайсса 66923 инсан, махъсса ца гьантлий тIурча – 111. Вакцинарду бувну бур республикалий 842909 инсаннал. Николай Павловлул бувсунни мукунма азарданул хьхьичIалу кьукьиншиврул цукунсса давуртту дуллан аьркинссарив.
ДР-лул ЦIуллушиву дуруччаврил министерствалул каялувчи Татьяна Беляевал бусаврийну, январьданул 1-нния 10-ннийнин ковидращал ва пневмониялущал уттуишин увсса хьуну ур 1064 инсан. Азарханардая итаавкьуну ур 825 къашайшала. ЛивтIусса хьуну ур 36. ХIакьину азарханардай хъин хъанай бур коронавирусрал къашавайсса 35 оьрчI-бакI ва лякьлуву хьусса 27 хъамитайпа. ХIакьину Дагъусттаннай хIадур бувну бур къашайшалтран 2095 койка.
БатIаврил хIасиллу дуллалисса махъ лавхъунни Сергей Меликовлул. Республикалул каялувчинал муниципалитетирттал бакIчитурайн тапшур бунни агьалинаву профилактикалул давуртту чялишну дуллан.