Январьданул 18-нний Дагъусттаннал БакIчи Сергей Меликов гьуртту хьунни АьФ-лул ХIукуматрал коронавирусрал инфекциялийн къарщисса Координациялул советрал президиумрал батIаврий. БатIаву хьунни Аьрасатнал премьер-министр Михаил Мишустиннул каялувшиврий.
АьФ-лул ХIукуматрал Председательнал тIимунийну, вирусрал цIусса штамм – «омикрон» анаварну ппив хъанай бусса бур щалагу дунияллийх. Мунияту, АьФ-лул Президентнал тапшурлугърайн бувну, ХIукуматрал хIадур дурну дур ялун ххи дурсса мероприятиярттал план, миннуя кумаг хьун аьркинссар, агарда билаятрай цакуну чIяву хьурча коронавирусрал къашавайми. Координациялул советрал батIаврий гьуртту хьунни министерстварттал ва идарарттал каялувчитал, субъектирттал бакIчитал.
Михаил Мишустиннул регионнал бакIчитурайн тапшур бунни анавар дуккан дуван «омикрон» штаммрал хьхьичIалу кьукьаврил давуртту.
Ванал тIимунийну, цIанасса ппурттуву азарханардай къашайшалт цакуну гьарза хьуну бакъар. ХIакьину вирусраятусса яла хъуннамур нигьачIаву – му азарханардай уттубишин бувми цакуну чIяву шавур. «ЦIанасса ппурттуву жунма ттигу къакIулли цуксса ччясса мутталий ппив хъанантIиссарив цIусса штамм. Аьркинссар хIадурну бикIан ччимур тагьарданийн», – кунни ванал.
ХIукуматрал Председательнал регионнал властирдайн тапшур бунни мюнпатну сакин дуван медициналул идарарттал ва анаварсса кумагирттал давуртту, чялиш дуккан дуван ковидрайнсса тестру даву, азарханардай ишла буллансса дарурттал луртан дуван, инсантурал лабизавурттайн цила чIумал жавабру дуллан.
Ванал ялагу бувсунни билаятрал цIуллушиву дуруччаврил системалун, регионнан ХIукуматрал цуксса кумаг бувантIиссарив.
Билаятрал вице-премьер Татьяна Голиковал тIимунийну, январьданул 18-ннийнинсса чIумал АьФ-лий азарданул структуралуву 60% бусса бур «Дельта» штамм, 40% – «Омикрон» штамм ва цаппара цаймигу. ЦIуцIаврил бувгьуми гьарза хъанай бусса бур 67 региондалий. АьФ-лул 42 субъектрай «омикрон» штаммрал къашавай усса ур 1682 инсан. Билаятрай коллективсса иммунитетрал даража бусса бур 63,9 %.
Михаил Мишустиннул бувсунни цила чIумал буллан аьркиншиву вакцинартту.
