Вице-спикер Камил Давдиевлул аьчухсса жавабру

«Дагестан» РГВК-лий «Подробности» тIисса передачалуву «Справедливая Россия – За Правду» партиялул региондалийсса отделениялул каялувчи, Дагъусттаннал Халкьуннал Мажлисрал вице-спикер Камил Давдиевлул жавабру дуллунни кIанттул цилакаялувшиндарал реформалул закон кьамул даврил хIакъираву хIасул хьусса суаллахьхьун.

Давдиевлул кIицI лавгунни ва закондалул хIакъираву хIасул хьусса цинявппагу пикрирду АьФ-лул Думалувун тIайла буккантIишиву.
Мукунма бувчIин бунни загьир хъанантIишиву шяраваллал аьрщарал ресурсру зузи даврил, шяраваллил бакIчи увчIаврил хIакъиравуссагу масъалартту.
– Вай масъаларттан хасъсса пикрирдугу ласун аьркинссар кIанттул цила каялувшиндарал реформалул законопроектравун. Шяраваллал администрациярттал каялувчитурал хIакъираву тIурчарив, ми цалва кIанттурдай личIлачIиссар. Масалдаран, ласунну Ссугъращиял шяравалу. Ссугърахь дикIантIиссар Гъуниннал райондалул территориал орган. Яни, хIакьинусса кьини, Ссугъращиял шяраваллил администраторная тIайла хьуну, кIикку зузисса цинявппагу инсантал бухлахи­ссар шяраву хIасул дурсса территориал органдалувун. ХIасил, шяраваллал муниципал органнал давриву даххана хъанахъи­ссар так мунил цIа, – увкунни Камил Давдиевлул.