Январьданул 25-нний МахIачкъалалив, Яруссаннал театрдануву, цалла 14 шинал оьрмулуву шамилчинсса цалалусса концерт ккаккан дунни чIава балайчи, чIавашиврух къаурувгун, республикалул кьатIувгу, билаятрал хъун шагьрулийгу машгьур хьусса, федерал каналлал диктортуралгу цал цIа зумух ларсъсса лакку оьрчI, Мурад Хушлаевлул. Шиккува дакIнийн бутан, Мурадлул ппу Малик Хушлаев ЦIуссалакрал райондалийсса Чапаево шяравассар, нину Ирина Рутуллал райондалийсса Ялувмур ЧIатлухъиял шяравассар.
Аьрасатнал студенчествалул кьини дуллалисса концертрайн куну язи бувгьуну бия тяхъасса, дакIнил хIал лавай буллалисса, жагьилтуран ххуй бизансса балайрду. Мурадлул ва кьини щаллу бувна авторский балайрдугу, Аьрасатнал цIа дурксса балайчитуралми балайрдугу. Залдануву ва кьини щяивкIун ия Мурадлул щаллу бувсса кIива балайлул автор Руслан АхIмаровгу.
Яруссаннал театрданул залдануву ва кьини хъунмурчIин бавтIун бия лавайми классирттал дуклаки оьрчIру ва студентътал. Концерт дачин дурну ия цIа дурксса балайчи ва ведущий СултIан Трамов. ЧIава балайчинал чIарав бацIан ва кьини бувкIун бия республикалул цIа дурксса балайчиталгу: Кристина, Марина Аьлиева, Зульфия, СултIан (Айгъази), Гульнара Надирова, шоу-балет «Адемос» ва м.ц. Пандемия сававну тяхъашивуртту, шадлугъру, хаснура жагьилтурансса, чан хьусса чIумал, ва концерт хьунни ца чаннашивуну, ххаришивуну. Концертрай бувкIсса оьрмулул хъуними ва мюрщими хъинну рязину ливчIунни ва шаппа-шаппай лавгунни ххуйсса настроениелущал.
– Хъунмасса барчаллагь ва концерт дуван кумаг бувсса гьарцаннанмагу, Дагъусттаннал паччахIлугърал филармониялун, 14 шинавусса оьрчIал концертрайн, цалла чIунгу харж дурну, цалва ишругу, даймур-дитаймургу кьариртун, бувкIсса цIанихсса балайчитуран, «звуковиктуран», «световиктуран» ва махъсса цинявннанмагу, – тIий бур Мурадлул нину Ирина Хушлаева.
Ва кьини залданувун бавтIсса жагьилтуравасса цаппарассаннан кIулну бакъая Мурад Хушлаев Дагъусттаннаясса балайчи ушиву, вай бия ва Аьрасатнава ча-унугу увкIсса ххай.
Мурад Хушлаев – МахIачкъала шагьрулул ОьрчIал филармониялул солистри, гьуртту шайссар МахIачкъала шагьрулул администрациялул, Культуралул управлениялул, Республикалул Культуралул министерствалул дуллалисса шадлугъирттай. Оьрмулул шиннах къаурувгун, Мурадлул бахшиширттал «чантай» биялну кIусса бур: Культуралул министерствалул, шагьрулул администрациялул чулухасса чIярусса грамотарттацIун, барчаллагьрал чагъардацIун, ваначIа дур Дагъусттан Республикалул Халкьуннал мажлисрал чулухасса цIа кусса ссят ва ХIурматрал грамота, Росгвардиялул чулухасса Гран При. Оьрмулул 11 шинаву Мурад лайкь хьуссар «Успешные люди 2018 года» титулданун ва ванал цIа дурхссар «Золотой фонд успехов и достижений» энциклопедиялувун. Мурад уттинин гьуртту хьуссар билаятрал лагрулийсса сий дусса конкурсирттай ва концертирттай. 2017-ку шиная шийнай Мурад хъанахъиссар Игорь Крутойлул Москавливсса Академиялул студент. Шиву ванал преподавательну уссар цIа дурксса музыкант, вокалист Константин Работов.
Мурад ур цал архIал цимирагу давриха зузисса оьрчI. ЧIивиниява цува агьсса спортравугу ванал итталун дагьансса ккаккияртту чIалачIи дунни, оьрчIал ва чIава жагьилтурал дянив дуллалисса карате киокушинкайлул республикалул турнирдай хьхьичIунсса кIанттурду бувгьуну. «Дагестан» РГВК-лийсса «Заряжайся» тIисса спортрал передачалул гьурттучигур ва. Мурад агьну ур чирилул давурттахунгу: 2019-ку шиная ва хъанахъиссар Волонтертурал Ss CIub клубрал членгу. Мурад гьуртту хьусса, гьуртту шаврицIун, финалистгу хьусса, оьрчIал «Новая волна», «Евровидение» ва цаймигу конкурсирттая жу кказитрал хьхьичIмур номерданий чивчуссар. ХIакьину кIицI лаглагими ишру хьхьичIмур макьалалувун къалавгмири.
