ГьунчIукьатIраясса видеофильмрал презентация

ГьунчIукьатIраясса видеофильмрал презентация

Январь зурул 18-нний Ма­хIачкъалалив, Расул ХIа­мзатовлул цIанийсса Миллатрал библиотекалуву, хьунни Гьун­чIу­кьатIрал шяраваллил тарихрая бусласисса документал журалий­сса фильмрал презентация. Ва видеосуратрал авторну ур журналист АхIмад Аьли­шаев. Мероприятиялул дайдихьу дуллали­сса махъ лахълай, ГьунчIукьатIрал жяматийсса ккурандалул хъунама ХIажибутта ХIусайновлул кIицI лавгунни авторнал хъуннасса даву дурну душиву шяраваллил тарих батIлай, бугьарасса инсантурахь цIухлай, къакIулмур кIул буллай, архиврду ххилтIу буллай.

– Сайки 15-мур аьсрулия байбивхьуну, хIакьинусса кьинилийнсса тарихрал лахIзарду ккаккан бувансса хIарачат бувну бур АхIмад Аьлишаевлул, був­сун бур шяраваллил язи-язи­минная, аьлимтурая, чичултрая, политиктурая, культуралул ва магьир­лугърал ишккаккултрая. Ва ГьунчIукьатIрал жяматралгу, аьмну лакралгу бусраврай ва барчаллагьрай кьамул дувантIисса давур, – увкунни ХIажибутта ХIусайновлул.
Видеофильмран ххуйсса кьимат бишлашисса ихтилатру бунни машгьурсса журналист Качар ХIусайнаевал, Дагъусттаннал халкьуннал шаэр Космина Исрапиловал, жяматийсса ишккакку Сулайман Хаппалаевлул, «ЦIубарз» журналданул редактор Хизри Илиясовлул ва цаймигу бусрав­сса инсантурал. Вайннал кIицI лавгунни, ялун нанисса никиран тарих кIулну бикIаншиврул, укунсса давурттив чара бакъа гихуннайгу дуллан аьркиншиву, видеофильмравусса инсантал щаллагу республикалул, Аьрасатнал лагрулий кIулсса, эбратрансса инсантал бушиву, жагьилтуран вайннал оьрмурду дарсруну хьуншиврул, укунсса суратру ккаккан дуллан аьркиншиву.
ХIажибутта ХIусайновлул барчаллагь увкунни тарихийсса ирс ябувансса хIарачат буллалисса библитекалул зузалтрахьгу. Культуралул программарттал отделданул хъунмур библиотекарь Муслимат Абакаровангу, журналист АхIмад Аьлишаевлунгу буллунни жяматийсса ккурандалул чулухасса Барчаллагьрал чагъарду.

Аватар

Патимат Рамазанова

Заслуженный работник культуры РД

Читайте также: