Республикалул энергетикалул комплексрал тагьар цалийн дуцаврицIун дархIусса АьФ-лул Президентнал цинярда тапшурлугъру цила чIумал бартдигьинтIиссар. Муния бувсунни Дагъусттаннал ХIукуматрал Председатель АбдулпаттахI Амирхановлул, паччахIлугърал бакIчинал пресс-конференциялул хIасиллан хасну кьамул дурсса тапшурлугъирттая буслай.
«Россети» ПАО-лущал цачIу жу ххал бигьинтIиссар энергетикалул аралуву зузисса республикалул электросетирдал хъунисса идарартту цачIун баврил масъалагу. Мукунма Президентнал тапшур бунни республикалийсса электросетьру мюнпатну зуншиврул бан-битанмунил хIакъиравусса предложениярттая бусан.
ХIакьинусса кьини республикалий бур электроэнергиялул хIаллихшинну дуллалисса 8 сетрал идара. Ми бакъассагу, республикалий бур личIи-личIисса заллухъруннал сетру ва заллухъру бакъассагу сетру.
Аьрасатнал Президент Владимир Путиннул республикалул хьхьичI бивхьусса масъалалий ккаккан бувну бур ми циняв сетру цачIун буван ПАО «Россети» электросетирдал компаниялул хъаттиралу. Мунийну бюхъан тIий бур цIакь дуван электросетирдал управлениялул лавайсса даражалул стандартру. Дагъусттан Республикалул ХIукуматрал хьхьичIххуттайсса масъала – муштаритал токрал щаллуну дузал бавур ва энергетикалул ара мюнпатну зузи давур», –кунни АьбдулпаттахI Амирхановлул.
ДР-лул ХIукуматрал Председательнал мукунма бувсунни, республикалул каялувчи Сергей Меликовлул тапшурлугъ бартдигьлай, гьашину региондалул ХIукуматрал «Россети Северный Кавказ» ПАО-лущал цачIу къулбасру дурну душиву электросетирдал объектру ххал буллай, миннул заллухъру кIул бувну, объектру бакьин бувну, зузи баврил ххуллул карталий.
Мукунна хIадур дурну дур республикалул электросетирдал комплекс вихшалану зузаврил ва модернизациялул программалул проект. Му проектрацIунсса рязишиву дуллуну дур АьФ-лул Энергетикалул министерствалул.
