Аьрасатнал Печатьрал байрандалий наградартту дуллунни «Илчилул» зузалтрангу

Аьрасатнал Печатьрал байрандалий наградартту дуллунни «Илчилул» зузалтрангу

Январь зурул 12-нний МахIачкъалалив, Оьруснал театрданул залдануву, лахъа-хъунну кIицI ларгунни Аьрасатнал Печатьрал кьини. БакIрайва кIицI лаганну профессионал байран барча дуван укун хъуннасса шадлугърайн театрданувун республикалул журналистътал бавтIсса иш махъсса шиннардий дакIнийвагу бакъашиву. Журналистътал барча буван сахIналийн бувккуна информациялул ва печатьрал министр УмархIусман ХIажиев, национал политикалул ва динийсса иширттал министр Энрик Муслимов, жагьилтурал министр Камил Саидов, Дагъусттаннал Журналистътурал союзрал председатель Аьли Камалов, Халкьуннал мажлисрал комитетрал хъунаманал хъиривчу Илман Аьлипулатов, жяматийсса ишккаккулт.

Залму АьбдурахIманова

Дагъусттаннал журналистътал видеороликрай барча бувна Аьрасатнал Журналистътурал союзрал председатель Владимир Соловьевлулгу, Аьрасатнал хъунисса СМИ-лул, ТАСС-рал, «Интерфаксрал», «Российская газеталул» хъуниминнал ва луттирду итабакьай Ассоциациялул хъунаманалгу. Шиккува кIицI лаганну, барча буллалисса видеоролик дакъассагу, ккаккан дуршиву Дагъусттаннал журналистикалул тарихрая бусласисса цамургу ролик.
УмархIусман ХIажиевлул хьхьичIунну зузи­сса цаппара журналистътуран дуллунни ХIурматрал грамотарттугу. Грамота дуллунни «Илчилул» журналист, цIанакул сайтрал хъунмур хъар цийнна ларсъсса Залму АьбдурахIмановангу.
Республикалул Журналистътурал союзрал председатель Аьли Камаловлул хIурматрал лишан «Легенда дагестанской журналистики» дуллунни чIярусса шиннардий «Новое дело» кказитрал хъунама редакторну зий ивкIсса ТIалхIат АхIмадхановлун ва «Илчилул» хъунмур редакторну зий бивкIсса Качар ХIусайнаеван. Вара хIурматрал лишан дуллунни дунияллия лавгсса МахIаммад Канаевлунгу, уссихлу ва награда ласун сахIналийн увккунни Мурад Канаев.
ХIадур дурну дия халкьуннал балайчитал МухIсин Камалов, Зайнаб Махаева, гьунар бусса Хиринду Султанова, Аьзиза Кьадирова хIаласса концертгу.

Аватар

Патимат Рамазанова

Заслуженный работник культуры РД

Читайте также: