«Зу дуручлачиссару Дагъусттаннал миллатирттал нахIушиву»

«Зу дуручлачиссару Дагъусттаннал миллатирттал нахIушиву»

Дагъусттаннал БакIчи Сергей Меликовлул Аьрасатнал Печатьрал кьини барча бунни Дагъусттаннал журналистътал.
– ХIакьинусса кьини СМИ-лул бияла хъунмассар Дагъусттаннал агьалинал нахIушиву дуруччавриву, чIяву миллатирттал дусшиву цIакь дувавриву, цинявннан аьмсса ххазинартту хьхьичIунну къуццу тIутIавриву. Жулва билаятрал ляличIишиву ва рувхIанийсса аваданшиву ядавриву хаснува хъунмасса бияла буссар миллатирттал прессалухь. Гьар кьинисса журналистътурал макьалар­ттал Дагъусттаннал агьалинан ссаву ци буссарив бувчIин буллалиссар, мяърипат дуну, инсаншиврий ялапар хъанахъаврийн оьвтIутIиссар, –кунни Меликовлул барча буллалисса цала текстраву.

ДР-лул ХIукуматрал Председатель АьбдулпаттахI Амирхановлул барча баву.
Печатьрал аралул зузалт хъанахъиссар хIукуматрал ва агьалинал дянивалу дуллалисса, агьалинал буруккинну хIукуматрал хьхьичIун ласласисса ва, хIукуматрал халкьуннал цIаний дуллалисса давурттая буслай, жаваблувсса даву бакIрайн ларсъсса вакилтал.
СМИ-лул биялдаралу дуссар агьалинавусса цумур-цагу аваза ягу ттуру-гъурушинна паракьат даву, агьали чантI учин баву. ЖурналистътурайхчIинни хIукуматрал дуллалисса давурттан ва политикалул иширттан агьалинал бишлашисса кьиматирттая кIул шайссагу.
Къабигьасса, амма агьамшиву ду­сса пиша язи бувгьусса зу зуйнна хъунна­сса жаваблувшинна ларсун буссару гьарца увкусса мукъул, эфирданул ва кказит-журналданий рирщусса макьалалул. Зул канихьсса информациялул ярагъ яла гужмур ва халкьуннаву бусравмур ярагъри. Зу республикалийгу, Аьрасатнал билаятрай ва мунил кьатIувгу хъанахъисса иширттах вичIилийва буссару. ЗуйхчIин дунияллий хъанахъисса гьарцагу иширая, личIишиву дакъа, оьккимуния ва ххуймуния хавар буну буссар яла архми кIанттурдай ялапар хъанахъисса агьалигу. ХIакьинусса кьинигу Дагъусттаннал шагьрурдай ва щархъаву ялапар хъанахъисса чIявусса агьалинан кказит-журналлу бусравнува, миннух ялугьлай, тIалав буллай, миннул хъирив бувккунма буссар. Цанчирча зу буну тIий агьалинал аькьилсса насихIатчиталгу, за кIулсса консультантъталгу, дакIниймур лаласайсса ихтилатчиталгу.
ХIакьину СМИ-лул каширду цалий къадарцIусса, гьантлия гьантлийн цIу хъанай, ялу-ялун цIу-цIусса дахханашивуртту дукIлакIисса замана бур. Интернетрал кумаграйну кказитирттал ва телерадиокомпаниярттал дазурду гьарта-гьарза хъанай, социал сетирдайхчIинну буккулт ва тамашачитал ххи хъанахъи­сса чIунну дур.
Пахрулий кIицI буллай ура Дагъус­ттаннал СМИ билаятрал даражалий­сса конкурсирттаягу ххувшавурттащал ва бахшиширттащал зана шайшиву. Вагу лайкь бансса хъунмасса ишри республикалул тарихраву бикIу, хIакьинусса политикалул оьрмулуву бикIу.
ХIурмат бусса масс медиалул зузалт! Барчаллагь зу бихьлахьисса захIматрахлу. Республикалий хъанахъисса ххуй чулиннайсса давурттая буслай, социал-экономикалул иширттаясса информация халкьуннал хьхьичIун ласлай, зу дуллалиссару агьамсса даву.
ЧIа тIий ура зун зуйнна дакIру тIайласса, зух мюхтажсса буккулт ва тамашачитал. Журналистнал махъ сававну, так ххуймур ва агьалинан мюнпат-хайр буми давуртту ххи хьуннав. ТIайлабацIу, цIуллушиву ва барачатшиву зул ялун дучIаннав!

УмархIусман ХIажиевлул СМИ-лул зузалтрахь барча дунни Печатьрал кьини.
ХIурмат бусса Дагъусттан Республикалул СМИ-лул зузалт!
Барча буллай ура журналистътал, редактортал, корректортал, оператортал, издательтал, полиграфиялул аралул зузалт ва информациялул аралущал дахIаву дусса циняв зузалт.
Жула билаятрай прессалул бугьлай бивкIссар ляличIисса кIану, бивщуну итабакьайсса СМИ хIурматрай ва машгьурну бивкIссар миллионну инсантурачIа. Дагъусттаннал пресса буссаксса хIаллай тIалавну диркIссар бунияласса хIакьсса журналистикалул лишанну: пагьму-гьунар, адав-иман (совесть) ва жяматрал хьхьичIсса жаваблувшиву.
ХIакьину жунма чIалай бур бищай­сса СМИ-лул давриву ишла дуллай бушиву сетьрал формат, цIакь дуллай цалла авторитет чIявусса иширттайну – информация ччясса мутталий дулаврия тIайла хьуну, хъанахъисса иширттан лайкьсса кьимат бищаврийн ва куртIсса анализ даврийн биянцIа. Му мукун бушиву тасттикь буллай бур жулва журналистътал цалва пишалул творчествалул конкурсирдай ххув хъанай бушиврул.
Циняв печатьрал зузалтран чIа тIий ура сивсусса творчествалул пикри-зикрирду бартбигьаву, буккултрал вихшала дишаву, цIакьсса цIуллушиву, талихI-тирхханну, паракьатшиву ва узданшиву!

Читайте также: