Итни ва тталаткьинирдай Лакрал театрданул сахIналий, цIу буккан бувну, хьунни бивкIу бакъасса эшкьи-ччаврил кьиссану хьусса Шекспирдул «Ромео и Джульетта» спектакльданул премьера.
Цалчинсса премьера хьуссия 2011-ку шинал. Бивхьуссар Болгарнавасса режиссер Богдан Петканиннул. Спектакль тамансса шиннардий репертуардануву буссия лакку мазрай ва оьрус мазрай. ТIайлабацIусса хьуна Ухссавнил Ккавкказнал шагьрурдайнсса спектакльданул гастроллугу.
КIицI бан багьлай бухьунссар, цIу буккан бувсса спектакльдануву хьунни Ромеол роль дургьусса жагьилсса артист Оьмар Оьмаровлул дебют.
Агьамми роллу дургьуну бур гайва гай артистал: Аслан МахIаммадов, Луиза Шагьдилова, Саният Рамазанова, Зинаида Чавтараева (Джульетта), Аьбдул Мурадов.
Спектакль ккаккан бунни «Пушкиннул карта» программалий ва мунил чIявуми тамашачитал бия лавайми классирттал дуклаки оьрчIру ва студентътал.
◊ Итникьини, декабрь зурул 13-нний 18 ссят ва 30 минутраву Оьруснал театрданул хъунмур залдануву хьунтIиссар С. Кьасумовлул «Оьтту ва макь» тIисса драма. Режиссер Дагъусттаннал халкьуннал артист Аслан МахIаммадов. ДикIантIиссар синхрон журалийсса таржума.
◊ Тталаткьини, декабрь зурул 14-нний 18 ссят ва 30 минутраву Оьруснал театрданул хъунмур залдануву хьунтIиссар Дагъусттаннал халкьуннал шаэр Сибирбаг Кьасумовлул 75 шинал юбилейран хас бувсса мажлис.
