КIинтнивунсса маслихIатру

Шарда кьадитира чIюлушиннарду

КьатIув буккан хьхьичI зуйрасса муххал чIюлушиннарду ликкира: кIисри, вичIилусру, канишру, ссиржинтру. Миннул, кьатIув ччяни дяркъуну, жулва бурчу бякъин буллалиссар. Ялунссаннун, кIиссурттал оьтту тIайлану щурущаврингу дайшишру дуллалиссар. Мукунма хъинссар муххал оправа дусса бишай яруннин кIанай кIинттул контакт линзарду лавххун.

ХIанттил бякъин битайссар

Аьнтсса хIачIия кьатIув, дякъийн буккан хьхьичI хаснура къахIарчIун хъинссар ва мукунма къалиянгу: хIарчIний инсаннан къабувчIлачIиссар цува аьхълахъисса ягу къааьхълахъисса, мукун, аьвкъуну, инсан къашавай хьун бюхъайссар, къалияндалуллив оьттул циркуляция лиян дуллалиссар.

Дуки дукра уччиннин

КьатIув буккан хьхьичI циксса колорияртту чIявусса дукра дуркурив, муксса хъунмасса хIаллай къабяхълантIиссару. КьатIув букканнин кIирисса чяй ягу кофе, бюхъавай, махIачIару, ми шаппай зана хьуну махъ хIарчIун хъинссар.

Чансса хIаллай аглан хьу

КьатIув бувккун нанийни, цахъи хIаллай хьулул хьхьичI (подъездраву)аглан хьуну хъинссар: къатлувунияр дюхлулсса, кьатIувнияр гъилишиву дусса кIанай чурх дякъийн буккан хьхьичI цахъи вардиш хьуншиврул.

Лаххи гьартасса ус

Малаххару къумасса ус. КIинттулсса усру дикIан аьркинссар ччаннал куццун даркьусса, хIатта цахъи хъуниссагума, гъилисса жуларду лаххан бюхъаншиврул.

Буххира чун-бунугу

Бахьтта архсса манзилданий най, кьатIув зува бяхълан бикIайхту, чара бакъа буххира хьунабавкьусса ттучандалувун ягу апттикIравун, 5-10 минутIрайсса гъилигу хьуну, гихунмай бачин.

ХIачIира нацIу дурсса чяй

Агарда кьатIув бявкъуну, лигьулул хьурча, шаппай бучIайхту, кару (ччанну) най дуна кIирисса щинаву(-лу) мадишару: бявкъусса базу гъилисса щиналун бувгьуну хъинссар, щин ялу-ялун гъили хьун дуллай. Амма хIал хьуну махъгу къабучIиссар лигьулул хьусса кIану кIирисса щинаву бишин. Лигьулул хьуми кIанттурду бакъассагу, гъили бувара щалвавагу чурх: гъилисса виргъандалулун бувххун, нацIу дурсса гъилисса чяйлул цаппара стаканну хIавчIун.

ЛачIун бува уссулун наждачка

КьатIув ччехдикIру дусса чIумал никъа бусса ягу чIан дюрчIусса ус малаххару. Агарда цамур чаран бакъахьурча, уссул дюрчIусса чIаннал мицIлийн ва никъурайн хъаласса ххяптIи чагъарданул (наждачка) касакру лачIун бувара.

Буккира виргъандалул лувату

КьатIув дяркъу дурчала куну, гьантрайсса, нюжмардийсса, зуруйсса гъили виргъандалулу кIучI хъанан къааьркинссар. Чара бакъа, гьарца кьини, кIюрххил, 10 минутIрайсса духьурчагу, зарядка дулувара, марцIсса гьавалийн булуккияра. Вания ххуйсса кумаг хьунтIиссар зул, хIалданунгу, чурххангу.

Лахъира шану

Чара бакъа лахъаван аьркинссар 8 ссятрайсса шану. Ва хъанахъиссар азардая, къашайшивурттая буруччинсса яла бигьамур кьяйда.

Яла хъинми «дустал»

Дукралун ишла дуллалияра клетчаткалул, белокрал ва витаминнал авадансса сурсатру. ЦIийх бувсса (квашеная) калан, болгар перец, къур, кьая, брокколи, накI, накIлил сурсатру, клюквалул морс ва хъанакIул отварду – вайнна бявкъусса шанмагу-мукьвагу зуруйсса жулва яла хъинми дустал. Вайннулли жунма кумаг бувантIисса иммунитет цIакь дуван ва инфекциярттал хьхьичI цIакьну бацIан.