Архсса зунттал шяраваллал дуклаки оьрчIан шагьрулийн театрданувун гьан-бучIан захIматсса шартIру хIисав дурну, Лакрал театрданул каялувчитурал пикри бувну бур, «Пушкиннул карта» шяраваллаву ялапар хъанахъисса жагьилтуращагу ишла дан бюхъаншиврул, ва программалун хасъсса гастроллу районнай сакин дуван.

Ва программалийхчIин декабрь зурул 1-нний Гъумук Магьирлугърал къатлуву ккаккан бунни кIива спектакль – А. Къапиевлул «Невыплаканные слезы» ва Карл Гольдонил «ХIаз бизансса иш». Райондалул КIулшиву дулаврил управлениялул хIарачатрайну спектакллу ххал бан бювхъунни Гъумучиял, ШавкIуллал, Щардал, Хъурхърал, Хьурттал, КIундиннал, Ккурккуллал, Кумиял, Кьубиял, ГьунчIукьатIрал, Хъунайннал ва ЧIурттащиял школарттал дуклаки оьрчIаща.
КIивагу спектакль ххал бувну бур аьмну 190 дуклаки оьрчIал.
Спектакллу къуртал хьуну махъ, школарттал каялувчитурал барчаллагь увкунни Лакрал театрданул каялувчитурахь ва артистурахь. Театрданул администратор Аят Рамазановал кIицI лавгунни, «Пушкиннул карта» ишла дуллалисса программалул гастроллу районнай дувансса сипта хъинчулий ккавккун, оьрчIру батIинсса кабакьу бувну бушиву райондалул бакIчи Юсуп МахIаммадовлул ва КIулшиву дулаврил управлениялул каялувчи Тамерлан МахIаммадовлул.
Бигьану бакъар, гьай-гьай, дяркъусса чIумал дарсирдая махъ оьрчIру батIин. Сайки цинявппагу школарттаясса оьрчIру бувкIун бия спектакллайн.
«Пушкиннул карта» ишла дурну зузаврил даву ттигу сантирайн дагьан дурар. Му программалийхчIин билетру ласун лахьхьин бувар ттигу чIявуминнан. Жу жула чулуха хIадурссару му ишираву кумаг буван. Амма бур ва программалух хъуннасса баччибакъулшиву дуссагу. Школарттал каялувчитуран кIулну бакъахьунссар, шинал ахирданий КIулшиву дулаврил министерствалул тIалав дуллан тIий бушиву «Пушкиннул карта» цукун ишла дурссарив. Жагьилсса ник магьирлугърал кьимат кIулну тарбия хьуншиврул, ми иширттан харж дансса арцу нитти-буттал жипава къадукканшиврул, паччахIлугърал итадаркьуну дур цамур билаятрай чувчIав дакъа­сса программа – «Пушкиннул карта». Оьванна дакъа хьун ритаяр, ишла дарча къахъиннив ва карта школалул программалунгу лябукку хьун тIий бухьувкун муния. На тавакъю бавияв школалул директортурахь, классрал каялувчитурахь, оьрус мазрал ва лакрал литература дишайсса учительтурахь «Пушкиннул карталул» мюнпатрая дуклаки оьрчIахь ва миннал нитти-буттахъахь бусан», – увкунни ванил.
Аят Рамазановал бусаврийн бувну, «Пушкиннул карта» программалул гастроллу уттинин хьуну дур ЦIуссалакрал райондалий.
Ва зурул 15-нний хьунтIий дур Ккуллал райондалий Ваччав Магьирлугърал къатлуву.
12.00 ссятраву ккаккан бан тIий бур Гьарун Саэдовлул «Къалайчитал», 14 ссят ва 30 минутIраву – Апанни Къапиевлул «Невыплаканные слезы».