Декабрьданул 9-нний ДР-лул БакIчи Сергей Меликовлул дайдирхьунни пресс-конференция «Региональные СМИ в условиях новой цифровой реальности : векторы развития» тIисса форумрал лагрулий.

Журналистътурал Сергей Меликовлухьхьун цалчин буллунни ларгсса шинал дурсса давурттал хIакъиравусса суал. Республикалул БакIчинал бувсунни шинал давурттал хIасиллан хасну 4 агьамсса масъала бушиву. «Цалчинмур бур халкь щинал дузал баврил, ми щин дукьан даврил, щин марцI дайсса сооружениярттал масъала. Аьркинни ккаккан буван щин дусса кIану, щин дуцинсса ххуллурду, циксса щин дуссарив кIул дуван, давуртту ссан дацIан тIий дуссарив хIисав-ккал дуван ва аьям буван щинахсса багьа», – кунни Сергей Меликовлул. Дагъус­ттаннал БакIчинал тIимунийну, ми давурттан итадакьин тIий бур миллиард къурушру. Вай дучIи дуван аьркинни цила ххуллий.
КIилчинсса масъала бур ТЭК-ралсса, газрал дузал баврил ва агьали токрал дузал баврил. Ва масъала дузал баншиврул аьркинну дур дуван щалла аралул инвентаризация. «Ва даву даван аьркинссия гьар шинах. Амма му ттигу дуллай бакъар. Утти жува хIарачат буллай буру ттинин 10-12 шинай къадурну диркIсса давуртту ца, кIира шинай дуван», – кунни Сергей Меликовлул. Региондалул каялувчинал бувсунни мукунма ЖКХ-лул системалувусса давурттал ва ххуллурду бакьин баврил давурттал хIакъираву.
Сергей Меликовлул дакIнийн бувтунни хIакьину кIицI дуллай бушиву Ватандалул Вир­ттаврал кьини. «Жухьра ихтияр дуссар Буттал КIанттул цIанийсса Хъунмасса дяъвилул Вирттаврая, къинттуллух зий бивкIминная, мукунма 1999-ку шинал Дагъусттаннай хьусса иширттал чIумал тархъаншиву дурурччуминная пахру буллан», – кунни ДР-лул БакIчинал.
Коронавирусрал хIакъира­вусса суалданухьхьун жаваб дуллай, Сергей Меликовлул бувсунни вара тагьарданий ялапар хъанай бушиву, Дагъусттан бакъасса, щалла дуниялгу. «Щалла дуниял дуркIун дур QR-кодирттайн, тийх му масъала ххал бигьлайвагу бакъар. Мура тагьар дур цаймигу регионнай, циванни му куццуй жувагу къуццу къатIун?» – кунни республикалул каялувчинал.
Сергей Меликовлул мукунма кIицI бунни жяматрал дукра дукайсса 80 % кIанттурдал дуручлай бакъашиву QR- кодру ишла баврил кьяйдарду.
Журналистътурал клуб дузал баврил хIакъиравусса суалдану­хьхьун Сергей Меликовлул укун­сса жаваб дуллунни: «ЖучIава чIявусса площадкартту бур журналистътуращал гъалгъарду буллан, ва пресс-конференциягу мукунсса ца площадкар. Площадкартту цуксса чансса бурив, муксса хъунмассар миннуясса мюнпат. Масалдаран, ласунну жучIавасса жяматийсса идарартту, ми бур Дагъусттаннай 200-нниха ливчусса, амма мюнпатну зий бур анжагъ 10-12».