Декабрьданул 14-нний Дагъусттаннал БакIчи Сергей Меликовлул ххал бивгьунни республикалий агьали ттукI лешлай, къатраву гъилишивугу, гъили щингу дакъа азурдану бушивруцIун бавхIусса масъалартту, мукунма коронавирус къадиянсса чараннал ва низамрал хIакъиравусса масъаларттугу.
Дагъусттаннал ЦУР-данул (Центр управления регионом) каялувчи МахIаммадсултан Аьбдуралимовлул бувсунни ноябрь зурул 23-нния декабрь зурул 13-ннийн бияннин сайки шаназарва аьрза бувкIшиву агьалиная кIай ялув кIицI лавгсса масъаларттацIун бавхIусса. «ЧIявуми аьрзарду МахIачкъалаллал агьулданиятусса бия, миннувугу чIявуми ттукI лешлашаврий рязи бакъасса. КIицI лавгсса чIумул мутталий ххюйла щин дакъа ливчIунни шагьрулул агьлу. Бур прививкарттал хIакъиравусса суаллугу. Масалдаран, Къаяккантуллал райондалул агьали аьрзирай бур прививкартту дуваврил даву сантирайн руртун дакъар, прививкартту дуван ччисса инсантуран лечлан багьлай бур тIий», – увкунни Аьбдуралимовлул. Шанна шиная арулла шинавун бияннинсса оьрчIру хъуни буллалисса кулпатирттан социал выплатартту чIал дуваврил савав дурчIин дунни захIматрал министрнал хъиривчу Ибрагьим Зайнуллаевлул. Меликовлул тIалав бунни, бувчIин бавурттугу риртун, хъирив лавну, шинал ахирданийннин выплатарду дулун. ПаччахIлугърал жилищная инспекциялул хъунама Сергей Касьяновлул бувсунни МахIачкъалалив, Южно-Сухокумскалий ва цаймигу шагьрурдай гъилишиву дакъа ливчIсса квартирардаву цанна-цанналусса отопление дуллай бушиву, оборудованиялул монтаж дурну къуртал давай бушиву. Меликовлул районнал ва шагьрурдал хъуниминнайн тапшур бунни, ттукI бакъар, отопление дакъар тIисса кIанттурдал хъирив лавну, инсантал азурда къабуллан, гьарцагу аьрзалул хъирив буккан анаварну. Гьаз бунни совещаниялий майнинг-фермардал ттукI бацлай бушиврул масъалагу. Коронавирус ппив хьун къаритан ккаклакисса чаранная ва QR-код бу-бакъашиврул ялув бацIаврия бувсунни ХIукуматрал Председательнал хъиривчу Мурад Казиевлул. Ванал кIицI лавгунни QR -кодгу тIалав буллай бакъашиву хаснува ттучаннай ва кафе-рестораннай, ноябрь зурул 17-нния тIайла хьуну хIакьинусса кьининийн 488 протокол бувшиву. Дагъусттаннал хъунаманал, цIушинал байрандалул гьантрай агьали хъиннува кьатIу-шах занан тIий бухьувкун, ва даврил ялув бацIавугу сантирайн рутан аьркиншиврий чIурчIав дунни.
