ЦIуссалакрал райондалий хьунни «Нагорный» тIисса Оптрал ва логистикалул центрданул строительствалул проектрал презентация. МуницIун бавхIуну райондалийн бувкIунни «Русские ярмарки» ООО-лул вакилтал. Инвестортал икьрал дуллай бур кIанттул ва региондалул властирдащал ЦIуссамехельтIиял шяраву агропромышленностьрацIун дархIусса инвестициялул проект щаллу дан.
Хъамал хьунабавкьунни ЦIуссалакрал райондалул бакIчи МахIаммадхIажи Айдиевлущал ва ЦIуссамехельтIиял жяматрал вакилтуращал. Инвестортурал бувсунни проектрая ци мюнпат хьунтIиссарив ва жавабру дуллунни жяматрал суаллахьхьун. Проект дузрайн дуккан даврийну инсантуран зунсса кIанттурду хьун тIий бур. Мукунма кIанттул производительтуран кабакьу хьун най бур цайми регионнал рынокрайн буккан. Ва ялагу, кIанттул бюджетравун налогру нанаврийну агьалинал багьу-бизу ххуй хьун тIий бур.
Проект щаллу дан 137 га аьрщарал итадакьин най бур.
Инвестортурал бусласимунийн бувну, ккаккан бувсса площадьрай миннан бан дакIний бур мизит, парковкарду, складрал ва производствалул къатри, парк, усру, хъаннил сумкарду ва катIри дуруххайсса цехру, контейнерду, оьрчIру тIуркIу тIунсса площадкартту ва м.ц. КIанттул агьалинаща шикку дахлан хьун тIий дур цала дучIан дурсса шяраваллил хозяйствалул продукция.
Пикри бур чIявусса инсантал зунсса кIанттурду бан.
Проект къулагъас дан багьлагьисса дур, цанчирча инвестортал вихшала дишин бучIисса, опыт бусса партнертал бур. Агана проект дузрайн дуккан дан бюхълай бакъахьурча, инвестортуращалсса икьрал лиянтIиссар. Ккаккан дурсса аьрщи машан ласун ихтияр дакъассар. Инвестортуран харж дурмур зана дуллан къабагьантIиссар.
Гьарица дуллалимур кIанттул агьалинал тIалавшиннарду ва мурадру хIисавравун лавсун дуллантIиссар.
Гихунай проектрал хIакъиравусса батIаву хьунтIиссар 10 гьантлува.
