ЦIуминалийсса Шушиннал школалий хьунни шийхсса школардай лакку мазрал дарсру дихьлахьисса учительтуращалсса хьунабакьаву.

Ванил сиптачи хьунни Мариян Илиясовал цIанийсса «Дараччи» фондрал президент Гульшан Хасаева. Мероприятиялий гьуртту хьунни ИГУ-лул профессор Асият Буттаева, «Зунттал хъами» журналданул хъунама редакторнал хъиривчу Аьжа Хаппалаева, ЦIуссалакрал райондалул КIулшивуртту дулаврил управлениялул хъунмур Светлана Кудаева, ванил хъиривчу Бахттун Шуаьева, Шушиннал школалул директор Шакират Шарапуттиновна ва цаппара школардал директортал. Мероприятие тIитIлай, ихтилат бунни Светлана Кудаевал. Ванил бувсунни ЦIуссалакрал КIулшивуртту дулаврил управлениялул цуксса къулагъасрайн лавсун буссарив школардай ниттил маз лахьхьаврил масъала.
Хъирив Шушиннал школалул лакку мазрал учительница Умамат Багъирчаевал лакку мазран хасну чIюлу бувсса кабинетраву дирхьунни хъамаллурал хьхьичI тIиртIусса лакку мазрал дарс. Ванил бувсунни цала (Шушиннал) шяраваллил тарихрая, бизан бувну махъсса халкьуннал оьрмулия, багьу-бизулия. Бувсунни ца-кIира шинал хьхьичI кьариртсса Шушиннал шяравун дуклаки оьрчIащал бувсса экскурсиялия, ккаккан дунни му чIумал ларсъсса сурат. ОьрчIал дурккунни лакку мазрай назмурду, увкунни балайрду. Дарс къуртал хьуну махъ лакку мазрал хIакъиравусса, му бухлаган къабитансса чаран лякъин багьлагьишивриясса ихтилатру бунни хъамаллурал.
Гьаз бунни лакку мазрай буклакисса кказит-журналлу чичаврил масъалагу.
Цала цIуцIи кIанттурдая бувсунни лакку мазрал учительтуралгу. Лакку маз ябаврил хIакъиравусса ихтилатру хьунни ссупралухгу. Хъамалгу, учительталгу хIала бувххун увкунни лакку балайрду. Хъамаллурал бавчIунни учительтурайх бахшишран лавсун бувкIсса луттирду.
Икьрал хьунни хъиривмур хьунабакьаву оьрчIал нитти-буттайнгу оьвкуну дан, цанчирча оьрчIан маз лахьхьин баврил хъунмур бияла вайннахь бур.
Хьунабакьаву мюнпатсса ва дакIний личIансса хьунни.