Аьдатравун дагьсса куццуй, Дагъусттаннал Виваллил иширттал министерствалул гьашинугу тIайла дурккунни цIусса шинал бахшишру Донецкаллал ва Луганскаллал республикардал ОВД-лул зузалтрал оьрчIан.

Чирилул акциялуву гьуртту хьунни Дагъусттаннал виваллил иширттал министр, полициялул генерал-лейтенант Аьбдурашид МахIаммадов, ванал хъиривчутал, подразделениярттал каялувчитал, жяматийсса советрал вакилтал ва ведомствалул зузалт. НацIу-кьацIу ва школалул кьай дусса азарунния лирчусса бахшишру дучIантIиссар цIусса шинайннин Донецкаллал ва Луганскаллал республикардайн.
Аьбдурашид МахIаммадовлул кIицI лавгунни ва акциялул сиптачи Дагъусттаннал МВД-лул Ветерантурал совет хъанахъишиву. Ванал барчаллагь увкунни ветерантурахь ва миннал дуллалимунил чIарав бавцIусса полициялул зузалтрахь.
МВД-лул къатрачIату шадлугърал даражалий тIайла бувккунни бахшиширттащалсса машина.
Умуд бур Дагъусттанная дуркIсса бахшиширттал ххари банссар бигьа дакъасса тагьарданувусса оьрчIру тIисса.