Вай гьантрай хьусса Ккавкказуллал чичултрал клубрал президиумрал заседаниялий цIусса каялувчи ивтунни. Клубрал Президентну бивтунни Аьрасатнаву поэзиялия хавар буминнан ххуйну кIулсса шаэр, таржумачи, критик, публицист ва жяматийсса ишккакку Миясат Муслимова.
Уттинин ва клубрал Президентну ивкIсса Ккавкказуллал ва Чачаннал халкьуннал чичу Муса АхIмадовлул бувсунни ххюра шинай цал клубрал хъунама аххана увайсса аьдат цIакь дуллалишиву ва Ккавкказуллал циняв регионнал хьхьичIунми вакилтал бакIра-бакIрах битлантIишиву. Вара заседаниялий клубрал вице-президентну бивтунни Осетиянал «Мах дуг» («Наша эпоха») литературалул журналданул хъунама редактор Оксана Хетагурова. Цийнна дурсса вихшалдарахлу барчаллагь тIий, Миясат Муслимовал кIицI лавгунни Ккавкказуллал агьалинал цашиву дуруччаврил ва культуралул, хасну литературалул дахIавуртту цIакь дуваврил ххуллий гъирарай ва тIалавшинна кIулну зунтIишиву, клуб хIасул бувансса пикри хьусса Муса АхIмадовлул цийнна дурсса вихшала цIакь дувансса хIарачатрай зунтIишиву. Клубрал заседаниялий чIурчIав дунни хьхьичI ххуттай дикIантIишиву Ккавкказуллал миллатирттал мазру ва литература гьаз дуваву мурадрайсса давуртту, циняв регионнал чичултрал произведениярттал таржумартту дуллалаву, литературалийхчIин чичултралгу, агьалиналгу дусшиву куртI дуваву.
Бусанну регионнал дянивсса жяматийсса идара хIисаврайсса Ккавкказуллал чичултрал клуб хIасул бувшиву 2008-ку шинал Нальчикрай, ванил гьану бивзмагу Къабардин-Балкьарнал ва Къарачай-Чаргаснал халкьуннал чичу СалихI Гуртуев ушиву. Гьамин, Миясат Муслимова сиптачину ва ванил хIарачатрайну уттигъанну кунма Дагъусттаннай хьуссия щалвагу Аьрасатнал лагрулийсса, СалихI Гуртуевлул цIанийсса, литературалул конкурс «Ватан духьувкун, талихIгу буссар» («Есть родина – а значит, счастье есть») тIисса конкурс. ДакIнийхтуну барча буллай буру
Дагъусттаннайгу, республикалул кьатIувгу литература гьаз дувансса давурттугу дуллай, цаймигу му ххуллийн кIункIу буллалисса Миясат Муслимова. ТIайлабацIу баннав!
Шиккува бусанна Миясат Муслимовал литературалул тарихраву личIансса цамургу даву дуршиву: ванил хIадур бувну, оьрус мазрай чичлачисса Дагъусттаннал шаэртурал антология» («Антология русскоязычной поэзии Дагестана») бувккунни вай гьантрай дунияллийн. Луттиравун багьну бур сайки Октябрь революция хьуния мукьахсса шаэртал, щаллусса аьсрулул лахъишиврийсса бутIа. ЦIанихсса шаэртуращал луттираву бур уттинин цIарду ялун къаливчусса шаэрталгу. Миннавух бур Дагъусттаннал университетрал преподавательтал, филологиялул элмурдал доктортал Самсон Наумович Бройтман ва Камил ХIамидович Ханмурзаев. Оьрус мазрай чичлачисса лакралми шаэртуравух бур Апанни Къапиев, Гьарун Саэдов, МухIуттин Чаринов, Космина Исрапилова, Жанна Абуева, Марат ХIажиев, Нажмуттин Убрынский, Адам Адамов. Ва антологиягу Дагъусттаннал агьалинал, литературалуха зузиминнал бусрав-барчаллагьран кьамул дувантIисса давур.
