Дагъусттаннай къуртал хьунни Ухссавнил Ккавкказуллал культуралул Цалчинсса форум. Ванил агьаммур мурад бия культуралул пишакартурал даврил даража лавай баву. Форум ДР-лул Культуралул министерствалул чIаравбацIаврийну сакин бувссар М. Горькийл цIанийсса Оьруснал театрданул.
Аьрасатнава бувкIсса экспертътурал ххюва гьантлул дянив форумрал гьурттучитуращал бувссар мастер-классру, группардансса семинарду ва заседанияртту.
Форум тIитIлатIисса шадлугъ хьуна М. Горькийл цIанийсса Оьруснал театрдануву. БавтIминнал хьхьичI ихтилат буллай, республикалул культуралул министрнал буржру биттур буллалисса Зарема Буттаевал увкуна:
– Форумрал сипта хIасул хьуссар театрал менеджертурансса Вахтанговский форумрай. Ва творчествалул вакцина дагъусттаннал аьрщарайн лавсун увкIссар Оьруснал театрданул директор Тимур МахIаммадов. Жу, Культуралул министерствалул, хъунмасса гъирарай кьамул буварду ва сипта.
Форумрал бусравсса хъамаличувну хьунни Евгений Вахтанговлул цIанийсса театрданул директор Кирилл Крок.
– Форумрай гьуртту хъанан нанисса цинявппагу спикертурал, хъамаллурал цIания махъ буллай ура пишакаршиврул чулуха жува, ца зат кьюлтI къабувну, кIулшиву, даврил опыт – жучIара дусса цимурца, жура культуралул идарарттаву ва театрдаву дуллалисса цимурца зущалгу кIидачIинсса. Яла зугу зучIара вай цимурца цукун шайрив ххал дуваншиврул, – увкуна Кирилл Кроклул.
Зарема Буттаевал бавтIми кIул бувна форумрал спикертуращал ва махъсса хъамаллуращал: Ярославуллал Ф. Волковлул цIанийсса драмалул театрданул директор Айрат Тухватуллин, Пермь шагьрулул академиялул Театр-Театрданул исполнительный директор Егор Мухин, спикертал – Наталья Сергеевская, Юлия Волкова, Игорь Колобков-Тесля, Ксения Дадыко, Владимир Казаченко, Валерия Маламура, Евгения Карпанина, Алена Мухина, Максим Шелунуов, Дарья Хаустова, Сергей Емельянов.
Форум тIитIлатIисса шадлугъ гихуннай лахъи ларгуна хъуннасса концертрайну.
Вания махъ форумрал даву дарчуна майданнай. Форумрал цалчинсса кьини Кирилл Кроклул ва Айрат Тухватулиннул щаллу дурна театрдал директортурансса программа. Мукунма хьуна грантирттал ва гастроллу сакин баврил даврицIун бавхIусса майданнугу.
Форумрал гихунмайми гьантрай личIи-личIисса ишру, федерал театрдал, музейрдал, маркетинграл агентствардал вакилтуращалсса хьунабакьавуртту хьуна Оьруснал театрдануву, Национал библиотекалий, «Аьрасат – ттул тарих» тарихийсса паркраву. Форумрал гьурттучиталну бия культуралувусса управленцы: каялувчитал, юристътал, бухгалтертал, пресс-службарду, smm-менеджертал. Ихтилатру хьуна культуралул идарарттай каялувшиву даврийн, грантирттащалмур даврийн, гастроллу сакин баврийн, проектру ва цайми-цаймигу ишру хьхьичIунмай баврийн багьлагьисса.
Форумрал хIасиллу дуллалисса батIаврий Тимур МахIаммадовлул барчаллагь увкуна ваний гьуртту хьусса спикертурахь ва махъсса цинявннахьвагу.
Культуралул министерствалул чулуха форумрал гьурттучитурал ва экспертътурал хьхьичI ихтилат бувна культуралул министрнал хъиривчу Мурад ХIажиевлул.
Форумрал гьурттучитуран дулунтIиссар пишакаршиву ларай дувансса Евгений Вахтанговлул цIанийсса театрданучIасса Б. Щукиннул цIанийсса Театрал институтрал чулухасса сертификатру.
