Дагъусттаннал Росгвардиялул зузалтрал ва аьралитурал барча бунни Ватандалул Вирттаврал кьинилущал Республикалул Мюхчаншиврул советрал секретарь полициялул генерал-майор МахIаммад Баачилов ва милицанал полковник Загьид Загьидов.
МахIаммад Баачилов барча уллай, Росгвардиялул кIанттул управлениялул хъунаманал хъиривчу полковник Натик Балабековлул кIицI лавгунни Вирттаврал кьини ватандалул цIа-кьини бюхттул дурсса, ялун нанисса никирттан эбратну хьунсса инсантурал байран душиву. Ванал дуллунни Виричувнан дакIний личIансса бахшиш ва Росгвардиялул Ухссавнил Ккавкказуллал округрал командующий генерал-лейтенант Сергей Захаровлуясса барча уллалисса телеграмма.
Аьрасатнал Виричув Загьид Загьидов барча ан Росгвардиялул зузалт ваначIан шаппай лавгунни.
Цала даврил уртакьтуращал – Каспийскаллал ОМОН-далул командир полициялул полковник Шамил МахIамаевлущал, МахIачкъалаллал ОМОН-далул командир, полициялул полковник Рамазан Аьлихановлущал ва ОМОН-далул ветеран полициялул полковник Макка Кьурбановлущал Виричувнал дакIнийн руртунни 1999 шин, цачIу ярагъуннил далгусса къачагътурал кьюкьращал талай бивкIсса захIматсса чIунну. ДакIнийн бувтунни тай иширттаву жанну дуллусса аьрали дустал.
– Ина кунмасса инсантал жула дянив бушиврия жун хъунмасса пахру буссар. Ина мудангу жагьилсса никиран ватан ххирашиврул ва кьянкьашиврул эбратну икIантIиссара, – увкунни ва барча уллай Шамил МахIамаевлул.
