«Расул ХIамзатов» жамилий цалчин гьаз бунни ттугъ

«Расул ХIамзатов» жамилий цалчин гьаз бунни ттугъ

Ноябрьданул 30-нний Дагъусттаннал БакIчи Сергей Меликов гьуртту хьунни МахIачкъалаллал хьхьирил портрай «Расул ХIамзатов» тIисса Аьрасатнал ФСБ-лул дазул къаралданул жамилий цалчин ттугъ гьаз баврил шадлугърай.

Дагъусттаннал БакIчинал дазул къаралданул аьралуннахь барча бунни му агьамсса иш. Му иш, кунни Сергей Меликовлул, буххантIиссар ФСБ-лул Дагъус­ттаннайсса дазул управлениялул тарихравун.
«Социалист ЗахIматрал Виричу Расул ХIамзатовлул цIа цIусса дазул къаралданул жамилун дизаву хъанахъиссар дазул къаралчитурал Дагъусттаннал агьалинащалсса цIакьсса дахIавуну, жула бюхттулсса шаэрнал творчествалулгу, щала оьр­мулулгу хIурмат бавуну. Аьра­сатнал Вирттал хьусса да­гъусттанлувтурал капитан Радим Халикьовлул, старшина Мухтар Сулаймановлул ва хъунама сержант Аьбдулхаликь Кьурбановлул цIарду дирзун дур республикалий къуллугъ буллалисса дазул къаралданул подразделениярттан. Ми шамуннал жанну дуллуссар Аьрасатнал дазурду дуручлай. Му хъинсса аьдат­ри, мунил кумаг буллали­ссар жулва жагьилтал тарбия буллан цIа дурксса дагъусттанлувтурал эбратрайну», – кунни республикалул каялувчинал.
Шадлугърай гьуртту хьунни мукунма Аьрасатнал ФСБ-лул Дагъусттаннайсса дазул управлениялул хъунама Андрей Карпенко, Каспийскаллал флотилиялул хъунама Александр Пешков, Расул ХIамзатовлул фондрал президент СалихIат ХIамзатова ва цаймигу. Миннал лавхъунни махъругу.

Читайте также: