Москавливгу чирчунни лакку мазрал диктант

Москавливгу чирчунни лакку мазрал диктант

Декабрь зурул 18-нний Москавлив Дагъусттаннал Постпредстволийн бавтIун бия лакрал диаспоралул вакилтал лакку мазрайсса диктант чичин, цивппа мегаполисрай яхъанай бухьурчагу, лакку мазрай буккин-чичин хъамакъабивтсса агьлу бушиву ккаккан буван. Ва даврил сиптачиталну бия Москавливсса Культуралул центр «Дагъусттан», кIицI лавгсса Постпредство ва Мариян Илиясовал цIанийсса «Дараччи» фонд.

Диктантрал текст Абачара ХIусайнаевлул «Арамтурал кIунттил ярагъ бувгьуна» тIисса кьиссалувасса парча бия, Гъумучиял базаллуя пасихIну, базаллул сурат хьхьичI дацIан дуванну, бусласисса.
Диктант хас дурну дия машгьурсса аьлимчу-ядерщик, Па­ччахIлугърал ва Лениннул премиярдал лауреат, фронтовик Амир Амаевлун 100 шин шаврин. Культуралул центрданул дуллалисса давурттай мудангу чялишну гьуртту хъанай ивкIсса хъунасса патриотнан. Диктант чичин бавтIцириннаву хъунасса аьлимчу кIулсса, ванащал щябикIлай-бизлай бивкIсса инсанталгу бия, вагу диктантрал ца хIисавравун ласунсса лишан хъанай дур. Мероприятие дачин дурну бия хасну ва иширанма куну «Дараччи» фондрал Москавлив тIайла бувксса «Дагес­тан» ГТРК-лул лакрал редакциялул редактор Тамара Закарьяева. Диктантрал текст ккалай бия Тамаращал архIал дагъус­ттан филологиялул факультетрал лакрал отделение къуртал був­сса Басират Билалова. Басират Москавуллал Культуралул центрданул хIасул бувсса бигьалагай кьинисса школалий лакку мазрал дарсру дихьлайгу буссия. Диктант чирчуну махъ авадан­сса культуралул программалиягу неъмат лавсуна лакрал диаспоралул. Тамаран ва Басиратлунсса бузмардугу, диктантрайн бувкIцири хъамалу бувансса ла­кку дукрардугу гьан дурну дия МахIачкъалалия «Инт» кафелул хъунмур Саидат Кьурбановал. «Дараччи» фондрал цIаниятусса грамотартту дуллуна Басират Билалован ва Постпредстволул вакил Зоя Ханован.
– Чув яхъанай бухьурчагу, жулва миллатрал маз ябуван­сса хIарачат бакъахьурча, иш цукун багьавив къакIулли, маз ишла буллан аьркинну бур, ла­кку мазрацIун дархIусса мероприятияртту ччя-ччяни дуллан багьлай бур, гъурбатрайми диаспорардугу лагма лаган бувну. Ца хъунмасса кулпат кунма цачIун хьуну, чичарду диктантгу, ванил сиптачитурайнгу, мероприятие дуван захIмат бивхьуцириннайнгу барчаллагьрай буру, – тIий бия диктант чичин бувкIминнавасса ПатIимат МухIуттинова.
Ххибан ливчIунни жагьил­сса инсанталгу къачанну гьуртту шаврил ххари бувшиву диктантрайн бавтIциригу, жувагу.

Суратру Дагъусттаннал Постпредстволул

Аватар

Патимат Рамазанова

Заслуженный работник культуры РД

Читайте также: