Декабрь зурул 18-нний МахIачкъалалив Хъун-Мизитрал чIаравсса «Россия — моя история» тIисса тарихийсса паркравун батIинтIиссар лакку мазрал тотальный диктант чичин.
Лакрал литературалул классик, чичу, аьлимчу Абачара ХIусайнаевлун гьашину 100 шингу хъанай духьувкун, ванал текстри диктант чичин язи бувгьуссагу. Ва хъундиктант чичин хьунтIиссар лакку мазрал кIулшивуртту ххал дуван гъира бунаща, лакку мазрал байран кьинилун ккаллисса давугу духьувкун, гьуртту хьун, миллатрал кьини хъун дан ччинаща. КIицI буванна диктантрал хIадуршиннараха зузими буниялттунгу, лавайсса даражалий тIайла дуккаву мурадрай, биялсса хIарачат буллай бушивугу, «Илчилул» вакил хIисаврай навагу заседаниярттай гьуртту шайшиву. Сиптачиталгу бур кIицI лавгсса тарихрал парк «Россия – моя история», МахIачкъала шагьрулул депутатътурал собрание ва Мариян Илиясовал цIанийсса «Дараччи» фонд. КIицI лавгсса паркрал хъунаманал хъиривчу, тарихрал элмурдал доктор, профессор АхIмад Кьурбановлул бувсмунийн бувну, так диктант чичаврийну гьашиву къадувантIиссар ва кьини, унгу-унгусса халкьуннал байран хьунсса даражалийсса даву дувансса хъит буссар. Лакку билаятрал суратирттал выставка, лакрал миллатирттал дуки-хIачIия ва лаххия, миллатрал балайрду ва къавтIавуртту, лакрал канил пагьмурду ккаккан буллалисса ва вайннухара лархьхьусса цаймигу ябацIанмур лякъинтIиссар ва кьини бавтIцириннан. Гьаннайсса, тамаша банмургу, неъмат ласунмургу миллатгу, миллатрал мазгу ххираминнан дикIантIиссар. Гьанумур мурадрив, гьай-гьай, жунма жулва маз ябуван аьркиншивруцIун ва му ххуллийсса чараннацIун, жулва хъунисса классиктурал ва виртталсса ппухълуннал мазрал кьиматгу, кьадругу бикIан аьркиншивруцIун бавхIумурди. «Диктант миллатрал маз ябаврил, яшаврил аьмсса концепциялул ца бутIар, вара кьини Москавливсса Лакрал диаспоралул вакилталгу чичлантIиссар диктант Москавливсса Дагъусттаннал Постпредстволий. Гьуртту хьунтIиссар кьатIаллил билаятирттайсса лакгума. Гьарзат къабусланна. БачIи бусарчагу, бачIи букъавсунува битанна. Циван? Зува бучIаншиврул, зунма ккакканшиврул.
Диктант дайдихьлахьиссар ахттайн чIумал, ссят цанний.
