[pullquote]Даниял Магьдиев зун ивкIссар Ккурккуллал школалий 1974-ку шинал. 35 шинал лажиндарай ва школалул директоршиву дурссар. Ванал гьану бивзссар школалул аьрали тарихрал музейрал. 2017-ку шиная айивхьуну, школалий дарсру дихьлай унува, ва музейрал директорнугу ивкIссар. Даниял Магьдиев ДР-лул лайкь хьусса учителли. ДР-лул ва АьФ-лул Халкьуннан кIулшивуртту дулаврил отличникри. Ва лайкь хьуссар Жуковлул, Лермонтовлул, Шолоховлул, Пушкиннул медаллан. 1996-ку шинал ванал лайкьну дурурччуссар педагогикалул элмурдал кандидат хьунсса диссертация. Шанна-мукьра шинай лув-ялув Данияллул лайкь дурссар «Шинал директор» тIисса цIа. Махъсса шиннардий ва уссия Лакрал райондалул Хъунисриннал советрал председательну.
[/pullquote]
Вай гьантрай Р. ХIамзатовлул цIанийсса Национал библиотекалуву хьунни гьунар бусса шаэр, ххаллилсса педагог ва патриот Даниял Магьдиев дакIнийн утлатисса мажлис. Шикку гьуртту хьунни ванал оьрчIру, гъан-маччами, дустал, коллегахъул, учениктал, цинявппагу ва ххирами. Бачин бувну ия мажлис Дагъусттаннал Чичултрал союзрал лакрал секциялул хъунама Илияс МахIаммадов.
Даниял Магьдиевлул творчествалия ва ванал лайкьшивурттая бусласисса ихтилат бунни «ЦIубарз» журналданул редактор, чичу, публицист Хизри Илиясовлул. Данияллун хас бувсса шеърирду бувккунни ва му дакIнийн утлатисса ихтилатру бунни Дагъусттаннал халкьуннал шаэр Космина Исрапиловал, «Дараччи» фондрал президент Гульшан Хасаевал, библиотекалул зузала Сарат Жабраиловал, «Ккурккуллал ккурчIа» ккурандалул администратор Анжелика (Аьиша) Абачараевал ва 9-мур лицейрал учительница, ккурандалувасса Якьут Мусаевал, МахIачкъала шагьрулул 16-мур школалул учительница ПатIимат Юсуповал ва мунил учениктурал, шаэрнал гъанчу, тарихрал элмурдал кандидат Аьвдуссалам Магьдиевлул, Данияллул хьхьичIунсса дус МахIаммад Хъунбуттаевлул, ДР-лул лайкь хьусса артист Арслан Шагьмардановлул, гъанчу Ханича Аьлиевал, 28-мур школалул учительница, шаэрнал гъанчу Сияли МахIаммаджабировнал.
Данияллун хас бувсса балай увкунни АьлихIажи Щамхаловлул. Ванал шеъри бувккунни 9-мур лицейрал ученик Мусаев Жабирдул.
Ттула учительнацIун бавхIусса лахIзарду дакIнийн бичлачисса ихтилат нагу бав.
Дагъусттаннал халкьуннал шаэр Мирза Давыдовлул кIицI лавгунни Ккурккуллал школалун Данияллул цIа дизан бакI цIуцIаву дан аьркиншиву ва цинявннал хIарачат бан багьлагьишиву ва масъала дузрайн буккан бан.
Мажлис къуртал хьуну махъгу, цинявппа гьурттучитал кьакъабагьавай буслай бия Данияллул узданшиврия, чумартшиврия, хъиншиврия, иш багьсса чIумал ванал бувсса кумагирттая.
