ЦIарая мюхчанну бикIияра

ЦIарая мюхчанну бикIияра

Операциялул лагрулий ялув бацIаврил ва профилактикалул даврил кIанттул подразделениярттал зузалтрал дуллантIиссар цIу ларчIсса ишру къахьунсса давуртту. Ххал буллантIиссар ЦIусса шинал байранну дуллалисса кIанттурду, идарарттал каялувчитуращал дуллантIиссар инструктаж, мукунна цIу ларчI­сса чIумал инсантал къатрава буккан баврил тренировкартту.

Виваллил иширттал министерствалущал цачIу дуллан­тIиссар сертификат да­къасса пиротехника дуллалисса ва дахлахисса кIанттурду кIул бан­сса рейдру. ЦIусса шинал байран дуллалийни цIарая мюхчанну бикIаншиврул щаллу дан аьркинссар цаппара тIалавшиннарду. КъабучIиссар чIявусса инсантал бавтIсса мероприятияртту цIарая мюхчан къабувсса къатраву дуллан. ХхюцIалунния ливчусса инсантал гьуртту хъанахъисса мероприятие дуллай бухьурча, муния МЧС-рал Агьаммур управлениялул электрон адресрайн чичин аьркинссар (und05dag@mail.ru.).
ЧIявусса дуклаки оьрчIру ва хъамал гьуртту хъанахъисса мероприятие 1-мур ва 2-мур зивурдая ларайсса къатраву дан къабучIиссар.
Укунсса мероприятие дуллалисса къатраву инсантал кьатIув буккан бансса кIива ххуллу бикIан аьркинссар. Къатраву телефон ва экстренный къуллугъирттал номерду чивчусса таблица, мукунна, иш багьарча, цIу лещан дансса затру дикIан аьркинссар. Елка цIакьну, къатрава кьатIув буккайсса ххуллу бащан къабуллалисса кIанттурдай бацIан бан аьркинссар. Мунил къяртригу чIирттая ва магъуя 1 метралул архну дикIан аьркинссар.
КъабучIиссар:
– елка паммалуя ягу кисайлия дурсса затирттал оьрчIи бан, ччяни цIу лачIайсса игрушкартту лахъан.
– ччяни цIу лачIайсса янналуву байрандалий гьуртту хьун.
– рядирттал дяних ххишаласса кIантту бишин.
– мероприятие нанисса чIумал чани лещан.
– байрандалул мероприятиялийн бучIи бувссаннуяр чIявусса инсантал итабакьин.
– мероприятие нанисса чIумал нузаву бацIлан.
– хлопушкартту, бенгальские огни ва цаймигу цIу лачIун дан бюхъайсса затру ишла дуллан.
Балики цIу лачIурча, хьхьичI­ва-хьхьичI дуклаки оьр­чIал­с­са бан аьркинссар. Инсаннал янналуцIух цIу ларчIун духьурча, му щяв увтун, ялун цIу къалачIайсса материалдания­сса парас бувтун, лещан дан аьркинссар цIу.
ОьрчIавун зарзала къадагьан, цIу лещан даннин миннал чIарав хъуними бикIан аьркин­ссар. Къатлуву пуркIу бухьурча, кьус бикIан бувну буккан бан аьркинссар оьрчIру кьатIув. ЦIу ларчIсса къатлувату бувккун нанийни, хъирив нуз лакьин аьркинссар пуркIу ва цIу ппив къахьун.
ОьрчIру кьатIув, нигьачIаву дакъасса кIанайн, буккан бувну махъ, ххал бан аьркинссар цинявппа бурив. Аьркин багьлай бухьурча, оьвчияра Анаварсса кумаграйн.
Оьвчияра экстренный къуллугърал номерданий: 112. КIий­­ла, шамийла оьвчирчагу къабяйкьинтIиссару.
Пиротехникалул затир­ттал чара бакъа сертификат дикIан аьркинссар. Миннуй дикIан аьркинссар инструкция ва итадаркьуминнал телефон.
Фейерверкру ласласийни къулагъас дувара къуршилух. Муний атил хьусса, ппив хьусса кIанттурду бикIан къа­бучIиссар. Фейерверкру кьавкьсса кIанттурдай ядан аьркин­ссар, къабучIиссар хъавтсса ягу хъинну кьавкьсса, кIирисса кIанттурдай, ччяни цIу лачIайсса затирттал, пачурдил ва цаймигу къатри гъили байсса прибордал чIарав ядуллан. КъабучIиссар ми жипливу, машиналуву ларсун занан.
КъабучIиссар фейерверкру оьрчIал ка дияйни ритан.
Дяркъусса чIумал ми гъили­сса къатлуву ядурну хъин­ссар, акъахьурча, ми хъатан бю­хъай­ссар.
Хъартсса фейерверкру батареялий, пачлий дирхьуну кьакьан дуллан къабучIиссар.
Марч бусса чIумал фейерверк­ру къаитадаркьуну хъинссар. Ми итадакьлакьисса кIанттурдай мурхьру, токрал ххаллу, цайми­гу дайшишру дуллалисса затру дикIан къабучIиссар. Пиротехникалул затирдайн цIу щуну махъ, га каниву ритан ягу ялун кьус бикIан къабучIиссар.
Ракетарду ва цаймигу лехлайсса затру итадакьин аьркин­ссар инсантал ялапар хъанахъи­сса къатрая, тIиртIусса чардагъру, дух хьусса магъив дусса къатрая архну.
Фейерверкру, ишла даннин дикIу, дурну махъ дикIу, ппив дуллан, миннул конструкция даххана дуллан къабучIиссар.
КъабучIиссар пиротехника 18 шинавун бияннинсса инсантуран ишла дуллан, агана чIарав хъунасса инсан акъахьурча. КъабучIиссар миннул чIарав къалиян тIун. Щях ришлан, цIаравун дичлан. Къатраву ишла дуллан. Пиротехника ишла дурну махъ, муничIан 5 минутрайсса гъан хьун къабучIиссар. КъабучIиссар пилта лещарча, цIунил лахълан. Зузи дан къархьусса фейерверкру бат дан аьркинссар 24 ссятрай щинаву дирхьуну.
КъабучIиссар ми цIаравун дирчуну ччучлан.

Аватар

Андриана Абдуллаева

Андриана Абдуллаева

Читайте также: