Агьалинащал хьунаавкьунни

ЦIуссалакрал райондалий декабрь зурул 6-нний, «Единая Ро­ссия» партия хIасул дурну 20 шин шаврил юбилейран хасну, агьали кьамул бунни ДР-лул Халкьуннал Мажлисрал депутат Артур Исрапиловлул ва ванал кумагчи Зайнуллагь Мирзоевлул. Вайннащал архIал агьали кьамул буллалисса хьунабакьаврий гьуртту хьунни ЦIуссалакрал райондалул администрациялул бакIчи МахIаммад-ХIажи Айдиевгу.

Депутатнал цалчин кьамул унни ЦIуссаккуллал шяраву ялапар хъанахъисса Рамазан Рамазанов. Ва увкIун ия душнин мебельданул цех бувансса аьрщи арендалий итадакьин кумаг баврил хIакъираву . Депутатнал ванан маслихIат бунни, аьркин­сса документру дузал бувну махъ, арендалий аьрщи итадакьинсса хIукму бан.
ЦIуссалакрал райондалул азарханалул инфекционный отделениялул заведующая Бирлиянт Шагьмандарова бувкIун бия бизан бувминнавух дагьайсса къатри дувансса аьрщи итадакьаврил масъалалул ялув. ЦIуссалакрал райондалул бакIчинащал цачIуну, Шагьмандаровал ходатайство кьамул дансса рухсат буллунни. Шиккува кIицI лаган, Бирлиянт Шагьмандарова ва масъалалул хIакъираву уттинин райондалул хъуниминнайн був­ккун бакъая.
Сант дирирну дуна, депутатнал азарханалул хIакиннащал ихтилат бунни райондалийсса коронавирусрал инфекциялул тагьарданул хIакъираву. Ванил бувсунни махъсса ппурттуву коронавирусрацIун дархIусса тагьар мадара къулай хьуну душиву ва къашавай хьуминнал ­аьдад ялу-ялун чан хъанай душиву. КIицI лавгунни къашайшалт хъин баврих хъуннасса къулагъас душиву.
Депутатнал барчаллагь ув­кунни, коронавирусрал азарданущал талай, къашайшалт хъин буллалисса хIакинтурахь.
Аьрщарал масъалалул ялув депутатначIан бувкIунни ЦIу­ссалакрал шяравасса Асият Жабраилова. Аьрщи итадакьинсса постановление булуншиврул, шяраваллил советрал дузал бувсса документирттал пакет гьан бувну бур райондалул администрациялийн. ХIакьину-гьунттий ва масъалагу щаллу бантIиссар.
Арендалий аьрщи итадакьаврил масъалалул ялув депутатначIан увкIун ия ТIюх­чардал шяравасса Багьауттин Ма­хIаммад­аьлиев. Ванахьгу маслихIат бунни, аьркинсса документирттал пакет дузал бувну, райондалул администрациялийн тIайла буккан.
Бизан буллалиминнал сияхI­равун цала уссугу агьан аврил хIакъираву увкIун ия Чанкуев Замираьли. Ваналгу бувсунни, уссу къашавай ушиврийн бувну, ва масъалалул хъирив лаяву цайнна тапшур дуршиву. Депутатнал маслихIат бунни, лак ЦIуссаминалийн бизан баврил масъалартталсса буллалисса ДР-лул ХIукуматрал Управлениялийн увккун, ва масъала дузал баву.
Банайюрт шяраву цIуну буллан пикрилийсса 140 оьрчIансса детсадрал хIакъиравусса ихтилатру бунни шяраваллил бакIчи Юнус Ибрагьимовлущал ва райондалул КIулшивуртту дулаврил управлениялул хъунмур Светлана Къудаеващал. Ва шяраву садик баврийну, мюрщултран школалийн бачиннинсса кIулшивуртту дулаву бакъассагу, хьунтIиссар шяравусса инсантурансса зузи кIанттурду.
Ва кьини депутатнал кьамул унни 15-хъул инсан. ЦачIанма бувкIсса агьалинал масъалартту лавсунни аякьалийн ва цаппарассаннул хIакъираву ккаккан дунни анаварсса мутталий дузал бансса чIун.