Укун учин бучIисса бия итникьини Лакрал театрдануву хьусса Дагъусттаннал лайкь хьусса артист, цIанихсса музыкант, аранжировщик, композитор ва лакрал лирикалул балайчитураву хьхьичIунсса ххуттай ишин лайкьсса Арслан Шагьмардановлул творчествалул мажлис-бенефис.
КIицI бан багьлай бухьунссар махъсса шиннардий Арслан Шагьмарданов зий ушиву Лакрал театрданул музыкалул бутIул каялувчину. Ванал каялувшиндарай хьхьичIуннай хьунни артистътурал балай учаврил усттаршиву, ларай хьунни концертирттал даража, драмалул жагьилсса артистураву ялун ливчунни ва итххявххунни балай учаврилссагу гьунар.
Балайчишиврий ва музыкантшиврий Арслан сий лахъну уссия 90-ку шиннардил дайдихьулий, аьпа биву, Мазагьиб Шариповлул «Хъусращи» ансамбльданул солистну усса чIумал.
1994-ку шинал Голландиянаву дунияллул халкьуннал дянивсса фольклорданул фестивальданий Дагъусттаннал делегациялувух бивкIми дакIнийн бутлан бикIай, Арсланнул чIунил ва такьвалул хIайран бувну бивкIсса куц цинявппагу хъамал. Ванал «мусил чIунин» лавайсса кьимат бивщуну, дуллуну дия фестивальданул ларайсса премия «Мусил рикI».
ТIайлассар, тания шинмай замана баххана хьунни, янил ляпI учиннин, жулламур магьирлугъ иттала дагьну, чилмур нахIу ларчIун ляркъунни. Амма Арслан къаавцIунни мукун анаварсса бущилий ялун бивгьуну нанисса «попсалул» щатIухьхьун ириян. КъаавцIунни цува хъамаитангу. Чан ливчIсса цала вичIидихьултрайнгу хиянат къавхьуну, най ия ттизаманнул шартIирдай, миллатрал рувхIанийсса ххазина ябансса шаттирду ласлай, жагьилтуран аслийсса лакку балайрдал, лакку макьаннал ххуйшиву ва нахIушиву кIул дуллай. Мода тара-тагу лагайссар. ЛичIайссар так язимур, бивкIу бакъамур. Ванахха кIура баллай уттива-ттигу жува жула аслийсса лакку балайрдайн, ттизаманнул балайрду чунчу учайхту.
Ттуява гъалгъа тIурча, Арсланнул творчество мудангу ххирану, ванал балайрдах мякьнувасса ца нагура.
Ванал творчествалул биялсса бутIа батIул къахьунну бавхIуну бур цала ниттил ПатIимат Шагьмардановал творчествалуцIунгу. ЧIивисса оьрмулий цила шяраваллил агьулданущал гуж-къиялий буттал мина кьаритан бувну, эяллайн дурксса ТтурчIиял щарних аьтIисса, лакку билаятрах мякьсса шеърирдацIун лап даркьусса ва дюххансса макьаннугу чирчуну, ми балайрду ниттил къюву аьч данну учай Арсланнул.
КьюлтI бан къашайсса гьавасращал увкунни га хьхьунугу Арсланнул вай балайрду – бачIи цала аккордеондалухун, бачIигу цайми музыкантътурал ярагъуннихун. Увкуна Мазагьиб Шариповлул ва Камалуттин КьурбанмахIаммадовлул макьаннайсса лакрал чичултрал мукъурттийсса балайрдугу.
Балайчинал савлугъ хъун дан бувкIун бия ванал пишалул уртакьтал, цIанихсса балайчитал: Даниял Шабанов, ХIажиаьли ХIажиаьлиев, Лариса ХIажиева, Шамсуттин Къапланов, Луиза Шагьдилова, Саният Рамазанова, Зульфия Архилаева, Арсен Аьлиев, Амрит ХIусайнаев, Абрек ХIажимурадов ва цаймигу. Вайннава чIявуминнал балайрдугу увкуна Арслан Шагьмардановлул макьаннай, щаллу дуруна ванащал дуэтругу.
Га хьхьуну тамашачитал цал уттигу хIайран бувунни Арсланнул гьунарданул: балайчи, музыкант, композитор, артист, хIатта къавтIалашиврийгума.
Концерт дайдирхьуну къуртал хьунцIа балайчитурахун руцлай бия музыкантътал («живой звук»): Дадаш Дадашев (скрипка), Аслан Кьурбанов (кларнет), цIанихсса дачIучитал — Казбек Къараев, Илдар Мухтаров, Мурад Хариев (синтезатор).
Концерт лайкьну дачин дурну бия Аслан МахIаммадов ва Саният Рамазанова.
ЛяличIину яргсса, цIу бусса, тамашачитурал асардай личIансса дия бенефис. Тамашачитурал цала мукъурттийну учин, ковид цIуцIаврил ссуссукьушиннардал бас бувсса инсантурал дакIнин малхIанну хьунсса. Мукун бушиву буслай бия ахирданий кьакъабагьавай хъатру ришлашисса тамашачитурал.
