Вай гьантрай дунияллул цикссагу бюхттулми ла­хъазаннайн лавхъсса альпинист Зиябуттин ХIажимирзаевлущал хьунаавкьунни республикалул спортрал министр Сажид Сажидов. Министерствалийсса ва хьунабакьаврий гьуртту хьунни олимпий чемпион ХIайдарбек ХIайдарбеков ва Дагъусттаннал панкратиондалул сборнайлул хъунама тренер, дунияллул чемпион Аьбдулкарим Айгунов. Сажид Сажидовлул барчаллагь увкунни республикалий спортрал цIа гьаз дуллалисса Зиябуттиннухь ва Спортрал министерствалул цIаниятусса Барчаллагьрал чагъар буллунни. Ва альпинистътурал дунияллий ххуйну кIулсса, сивсусса, оьрчIнийва зунттал бакIурдийн гьаз хъанай, бизантту мютIий буллай савсъсса багьадура ур.

ДакIнийн бутанну, Зиябуттин ХIажимирзаевлул, ца яла сивсу­сса ва гьунар ххисса альпинист хIисаврай, тимар дурссар дунияллий дур учинсса бюхттулшивур­тту. Миннувух: Эльбрус – 5642 м.; вулкан Тейде (Испания) – 3718 м.; Килиманджаро (Танзания) – 5895 м.; Аконкагуа (Аргентина) – 6962 м.; Охос-Дель-Саладо (Чили) – 6893 м.; Орисаба (Мексика) – 5636 м.; Монблан-Зунтту (Франция) – 4810 м. ва м.ц. ХIакьину ва зий ур Дагъусттан Республикалул Транспортрал ва ххуллурдал хозяйствалул министерствалий, паччахIлугърал машлул (закупкардал) отделданул начальникну.
Дагъусттан Республикалул лайкь хьусса строитель ур, Да­гъусттан Республикалул Госсоветрал ва Дагъусттан Республикалул ХIукуматрал ХIурматрал грамотарттангу лайкь хьуну ур. Цала даврицIун дархIусса кIулшивуртту куртIгу, цIакьгу дуллайнувасса минахур акъагу, Зиябуттин дугърисса, инсаннан ка-кумаг буван анавар уккайсса, хIал бавкьу­сса, дакI-аьмал хъинсса зунтталчув ур. Ва чялишну гьуртту шай жяматийсса оьрмулул иширттавухгу, ихIсандалул, культуралул давурттавухгу.
ДакIнийхтуну барча уллай буру жугу ххуйсса ихтилатчи, ххаллилсса дус ва насихlатчи, лажин кlялану гьарца давриву цува чlалачlи айсса зузала, нигь цирив къакIулсса альпинист, миллатрангу, Дагъусттаннангу бусравсса инсан. ЧIа тIий буру цIакьсса цIуллушиву ва цIу-цIусса лахъазанну!