Октябрь зурул 29-нний ЦIуссалакрал райондалий Щалагу Аьрасатнал юнармиялул кьинилун хасъсса агьамсса мероприятие хьунни. Ва кьини райондалул школарттал дуклаки оьрчIру кьамул бунни «Юнармия» тIисса Щалагу Аьрасатнал аьрали-патриот суккушиндарал кьюкьравун.
Шикку гьуртту хьунни ЦIуссалакрал райондалул бакIчинал хъиривчу Гъаирбаг Мусаев, Райондалул кIулшивуртту дулаврил управлениялул хъунмур Светлана Къудаева, ЦIуссалакрал райондалийсса ПДН ОМВД-лул хъунама инспектор Тимур Шавлухъов, 1999-ку шиналсса ополчентурал оперштабрал хъунама НурмахIаммад НурмахIаммадов, райондалул школарттал пионервожатыйтал, хъуними классирттал дуклаки оьрчIру ва нину-ппу.
Мажлис тIитIлатIисса ихтилат бунни Светлана Къудаевал. Ванил бувсунни Аьрасатнал дуклаки оьрчIал суккушиннарал дуллалисса «Юнармия» цIанилусса Щалагу Аьрасатнал аьрали-патриот даврил агьамшиврия. КIицI лавгунни умуд бушиву, юнармейцынал кьюкьравун дуклаки оьрчIру кьамул бувния шинмай, школалул ва щалагу райондалул цIа-кьини бюхттул дуллансса давуртту дулланссар тIисса.
ОьрчIал увкунни балайрду, бивзунни къавтIун, ккаккан дунни анаварсса мутталий ттупангру ппив баврил ва батIаврил усттаршиву ва каруннах бияврил магьиршиву.
Хъирив дуклаки оьрчIал бунни юнармейцынал дусшиврийн дакI тIайлану бикIансса хъа.
Ва мероприятиялий гьуртту хьусса цинявннал барча бунни оьрчIру «Юнармейцынал» кьюкьравун буххаврищал.
БатIаву къуртал хьунни Аьрасатнал дуклаки оьрчIал суккушиннарал гимнрайну ва душварал флешмобрайну.
