Аьрщарай ххяххан дуван ца яла бигьамунин ва инсаннал цIуллу-сагъшиврун ца яла мюнпат бумунин ккаллину бур къавахъ. КIинттулнинсса луртанналувугу, цув аьркин бувну, цикссагу дукрарду дуван бучIисса къавахърал бугьлай бур лайкьсса кIану. Хасъсса тIалавшиннарду дуруччирча, къавахъ хъунмасса хIаллай яшайссар.
* * *
Къавахъ биттун аьркинссар баргъ бивтсса, кьаркьсса кьини. Битлатийни, секаторданух кьуркьуну, къавахърай кIюйлуя махъ цахъи ххалгу диртун хъинссар, бюхъавай. Укунсса къавахъ хъунмасса хIаллай яшайссар.
* * *
Битлатийни, кIинттулнин букьлакьийни, хъуннасса агьамшиву дуссар къавахърал кIюй щаллуну личIаврил, му гъаргъсса къавахъ ччяни зия хъанай байбишайссар.
* * *
КIинттулнин букьланнин, къавахъ нюжмардийсса гьавалий бивтун хъинссар, бюхъавай бургъилу. Хьхьурай хъатру, дяркъу духьурча – дяхтта кьатIув буккан буллай, хьхьувай къатлувун буххан буллай. Дяркъу, гъарал дусса гьантри бухьурча – къатлуву битан аьркинссар кьакьлай.
* * *
Къавахъ ябан аьркинссар хъатру дакъасса, цIансса (ягу чани чансса), дюхлулсса къатлуву.
* * *
КIинттулнин ябуллалисса къавахъ бишин аьркинссар цивппа-цивппалу, кувннийн кув къащунну.
* * *
Бюхълай бухьурча, хъинссар къавахърал лув нахь (солома) дирчуну.
* * *
КIинттулнин ябуван бувкьсса къавахърайн бургъил тIинтту дагьлай къахъинссар.
* * *
КIинттулнин ябуллалисса къавахъ дачIрасса щяв, аьрщарай бивхьуну къахъинссар.
* * *
Агарда, битлайна, лавсун найна, къавахърай ххарсив хьухьурча, му ччяни зия къахьун, «щавурду» цIу лаган, миннуйх зеленка дурккун хъинссар.
* * *
Гьарца къавахърал, цила-цила сортрах бурувгун, дуссар яхьун цинна ккаккан дурсса чIун, 90 гьантлуя, 300 гьантлуйн дияннинсса.
* * *
Къавахъ най буна щалва шюшин къабучIиссар. Дукралувун аьркинссаксса ишла бувну ливчIсса, холодильникравун букьан нанисса къавахъ шювшумур ччяни зия хъанантIиссар.
* * *
Къавахъ цуксса хъунмасса хIаллай ливчIрив (так аькъаян ялув бавцIуну), муксса нацIу хъанахъиссар – гъилахъаннин миву салкьи хъанай бивкIсса крахмал качарданийн (нацIушиврийн) кIура баллалиссар.
