ЦIуссалакрал райондалий мудангу хIурматрай дакIнийн бичай къуллугърал бурж бартбигьлай цала аьрщарай жанну дуллусса виваллил иширттал органнал зузалт. Райондалул агьалинал оьттун руцлайннасса щавуну ливчIунни 1999-ку шинал сентябрь зуруй ТIюхчардал шяраваллил зумакъирагърай Калач-на-Дону шагьрулиясса виваллил аьралуннал бригадалул аьралитурай къачагътурал бувсса оьсса зулму.
Жула халкьуннан мудангу дакIний дикIантIиссар вай аьралитурал цIарду: Василий Ташкин, Владимир Кауфман, Алексей Липатов, Борис Эрднеев, Константин Анисимов, Алексей Полагаев.
Сентябрь зурул цалчинсса кьини взводрал командир, хъунама лейтенант Василий Ташкиннуйн амру бувкIун бур Дагъусттаннал ва Чачаннал дазуй, ТIюхчардал зумакъирагърай ацIан цала аьралитуращал. Шяраваллия арх дакъасса лахъазанттуй аьралитурал дурккун дур окопру, хIадур бувну бур БМП дацIан дансса кIантту. Чачаннал Ишхайюрт тIисса яла гъанмур шярава ТIюхчарав дахьра 2 км дур. Дазуйсса Ахсай нехгу боевиктуран дайшишру дакъар. Бигьанма куклу машиналий лахъан бюхъайссар. ЧIараввасса зунттул махъсса Галайти тIисса шяравалу ярагъуннил балгусса боевиктурал дурцIуну диркIун дур. Дурламалувух уруглагисса Ташкиннун чIалай бивкIун бур техникалущалсса боевиктал чунмай наниссарив, чIалай бивкIун бур ми цаламур постраягу ябатIлай бакъашиву. Ванал бурж бивкIун бур шяравун ва шярава нанисса кIива КПП мюхчан баву.Ташкиннун бувчIлай бивкIун бур цуксса нигьачIаву дуссарив КПП-лийсса милицалтрангу, цаннагу. Ярагъгу боевиктал бусса зунттул чулухунмай буруган бувну, бавцIуну бивкIун бур аьралитал. Амма боевиктурал хар-хавар бакъа гьужум къинттуллуха бувну бур. Гужру, гьай-гьай, архIалсса къабивкIун бур. БоевиктурачIа биялсса ярагъ, гранатометру, рациярду…
КIира ссят ва ххишалагу хьуну дур БМП-лул боевиктурайн цIу тIиртIуну. БМП бат дан къахъанай мадара инжит хьуну бур къачагътал. ЧIявусса къачагътал кьатI бувну махъ цIу ларчIун дур БМП-луцIух. ПIякь тIун диркIун дур снарядру. Сагъну унува ччувччуну ур механик-водитель, 11 инсан ивкIун ур БМП-луву.Ташкиннуща ва махъми аьралитураща, щавурду дирмигу лавсун, лахъазанттуя КПП- лийн милицалтрачIан бучIан бювхъуну бур. Боевиктурал гьан бувну бур милицалтрачIан шяравасса инсантал, ярагъгу кьабивтун, буккияра, оьрусгу булара, зуйн ка къащунну учин. Милицалтран бувчIлай бивкIун бур цала гуж чансса бушиву, къачагътурал КПП бигьанма ппив баншиву. Пикри хьуну бур, хIилла дурну, шяравун бувххун, шяраву талан. Вана укун КПП-лийн бувкIсса шяраваллил жяматравух хIала бувххун, 18 милицанал зузалагу, 30 аьраличугу шяравух ппив хьуну бур. Ташкин мукьа аьраличунащал кIучI хьуну ур цавайннал чIаркIнил чардагърай. Му кIул хьуну, боевиктурал гранатометирттава цIу тIиртIуну, ппив дурну дур чаркIнил магъи. Му ппурттуву, вара хIаятраву щавурду дирну, рухI дуллай цува унува, боевиктурал командиргу бивтун увтун, жан дуллуну дур милицанал сержант Аьбдулкьасин МахIаммадовлул. АьралитурачIа ккулла- янсав къуртал хьусса чIалай, къатрал заллу лавгун ур боевиктуращал ихтилат буван. Миннал махъ буллуну бур аьралитурайн ка къащун.Ташкин ва мукьагу аьраличу кьатIув бувккун бур. ХIаятраву хьунаавкьусса къатлул залуннахьхьун Ташкиннул дуллуну дур цала кулпатрал ва душнил сурат. КъабацIан бувну бур къачагътурал цала махъ. Ххюягу вайгу, шяравусса Аьтикат ТабиевачIа кIучI хьуну ивкIсса, щала ччувччусса Алексей Полагаевгу ххюрхху увну уккан увну, шяраваллил зумакъирагърай боевиктурал аьщун бивзссар. Вайннай бувсса оьсса зулму ТIюхчардал Голгофа тIий тарихраву ливчIссар.
Ташкин Василий, 10-мур м/с роталул командирнал хъиривчу, взводрал командир, хъунама лейтенант. Къуртал бувну бур АьФ-лул МВД-лул Новосибирскалийсса Высшее военное училище.
Кауфман Владимир, 10-мур м/с роталул ляличIисса бигарду биттур байсса, 4- мур батальондалул биту, рядовой.
Липатов Алексей,10-мур м/с роталул ляличIисса бигарду биттур байсса, 4- мур батальондалул биту, рядовой.
Эрднеев Борис,10-мур м/с роталул ляличIисса бигарду биттур байсса, 4-мур батальондалул биту, рядовой.
Полагаев Алексей, 2-мур м/с роталул ляличIисса бигарду биттур байсса, 1-мур батальондалул механик- водитель, рядовой.
Анисимов Константин, 67-мур аьрали частьрал спецназрал 3-мур группалул биту.
Къуллугърал бурж бартбигьлай жанну дуллусса вирттавравух цал ттигу вай цIардугу дакIнийн дичинну.
