Ванал цIа дакIнийн дутай бусраврай

Ванал цIа дакIнийн дутай бусраврай

Ва зуруй 65 шин хьунтIиссия Ккуллал райондалий каялувшиву дуллай ивкIсса, Хъювхъиял шяравасса Сулайманов Саэд ХIасниевичлун. Мукунсса бухьунссия кьадар, ванан оьрмулия щалихханнин, мурадру бартлаганнин дуниял кьаритан багьансса. АцIния ххюрахъул шиннардий райондалий каялувшиву дуллай Саэд ХIасниевичлул щархъал ахIвал-хIал къулай баву мурадрайсса цикссагу давуртту дурссар. Ванал каялувшиву дуллай ивкIсса район, та ппурттувугу, хIакьинусса кьинигу чIявусса масъалартту бусса дур. Саэд тIурчарив, ия чIумул захIматшивурттая нигьа къаусайсса, бюхъу-бажар бусса, хьхьичIунай хъит куну нанисса каялувчи.

Саэд Сулайманов

Увну ур Саэд 1956-ку шинал октябрь зурул 18-нний Хъювхъиял шяраву.
1972-ку шинал буттал шяраву школагу къуртал бувну, дуклан увххун ур Дагъусттаннал 1-мур педучилищалувун. Миву дуклакисса чIумалгу Саэд ивкIун ур итталун агьансса, сий дусса жагьил. 1982-ку шинал увххун ур Дагъусттаннал пединститутрал тарихрал факультетрайн. Институт къуртал бувну увкIсса жагьилсса пишакар ивтун ур Ккуллал райондалул школарттал инспекторну. Шикку зий дурну дур ванал ца шин. Райондалул каялувчитуран хIисав хьуну бур даврил сант кIулсса, зун гъира-шавкь ду­сса жагьилсса пишакар ушиву Саэд. Мукун, ва къуллугърая увцуну, ивтун ур Ккуллал райондалул исполкомрал сакиншиндарал отделданул каялувчину. 1992-ку шинайн ияннин зий ивкIун ур ва къуллугърай.
Вара шинал Саэд ХIасние­вичлуйн вихшала дурну дур Хъювхъиял колхозрал председательшиву дан. Арулла шинай ивкIун ур ва даврий. 1999-2005-ку шиннардий ивкIун ур Ккуллал райондалул администрациялул бакIчинал хъиривчуну зий.
2005-ку шинал ивтун ур Саэд Ккуллал райондалул администрациялул бакIчину. Райондалул маэшат хьхьичIунмай баву мурадрай къуццу бан кIулсса, бакIрайн ларсъсса, дуллалисса даву дузрайн дуккан дан бюхъу-хъит бусса Саэд ганияр махъгу кIийла увчIуну ур райондалул каялувчину. Цайнна вихшала дурсса къуллугърай дакI марцIну захIмат бихьлай, хIисав-ккалли дансса хъин-хъинсса давуртту дуллай, тасттикь бувссар цува агьалинай дакI-цIимисса каялувчи ивкIшиву. Гьай-гьай, укунсса къуллугъирттай зузисса цайми-цайми каялувчитуран кунма, бигьану къабивкIссар ванангу цинявппа агьали рязи буллан.
Саэдлул райондалий каялувшиву дуллалисса чIумал хъуннасса къулагъасрайн ласайва кIулшивурттал аралуву зузисса учительтурал, цIуллушиву дуруччаврил идарарттай зузисса хIакинтурал масъалартту. Цувагу учительну зий ивкIсса каялувчинан ххуйну кIула райондалул бучIантIимур ва экономикалул даража хьхьичIунмай баву куртIсса кIулшивуртту дусса жагьилсса пишакартурайн хъар хъанахъишиву. Мунияту хIарачат буллан икIайва райондалий кIулшивуртту дулаврил аралуву зузиминнансса шартIру дузал дан.
«Саэд ия хьхьичIунсса политик, чантI увкусса инсан. Ванал ляличIисса аякьа дикIайва райондалул агьалинал ахIвал-хIал ххуй баврих, цIуллу-сагъшиву дурччаврих, культуралул даража гьаз баврих. Ва ия ххаллил­сса строительгу. Щархъаву дуллалисса объектирдан кьимат бищун кIулсса специалистгу»,– тIий, дакIнийн бутлай ур Аьлилов МахIмуд.
Тай шиннардий республикалул каялувчитурайн увккун, Саэдлул хIарачатрацIух бувссар Ккулувсса ва Ва­ччав райцентрданийсса школар­тту. Вай школартту тIитIлатIисса шадлугъирттай гьуртту хьун бувкIун бивкIссар Дагъусттаннал Республикалул хъуними хIаласса делегация.
Бивхьусса захIматрахлу лайкь хьуну ур Саэд паччахIлугърал чулухасса наградарттан. 2002-ку шинал Саэд Сулаймановлун дуллуну дур «ДР-лул муниципал къуллугърал лайкь хьусса зузала» тIисса бусрав­сса цIа. ХIакьинусса кьини ва дакIнийн утай ва ванал цIа бусраврай зумух ласай архIал зий бивкIминнал ва райондалул жяматрал.

Аватар

Имара Саидова

Журналист, обозреватель. Освещает культурные собыия в Лакском и Новолакском районах.

Читайте также: