Стратегиялул лябуккулул ва проектирдал давурттал советрал батIаврий

Ноябрьданул 9-нний Дарбантлив ДР-лул БакIчи Сергей Меликовлул каялувшиврий хьунни Дагъусттаннал БакIчиначIасса Стратегиялул лябуккулул ва проектирдал давурттал советрал батIаву. Муний ххал бивгьунни региондалий 2021-ку шинал национал проектру бартдигьаврил масъала.

Сергей Меликовлул кIицI бунни Советрал агьамми мурадирттавасса цану хъанай бушиву проектру бартдигьаврил хъирив бацIаву. Ми ккаккияртту цIанасса ппурттуву Дагъусттаннай цIакь дурну дуссар национал проектирдал лагрурдай. — — — Гьарца нацпроектравун ларсъсса ккаккиялул чIалачIи дуллалиссар жучIара дурсса давуртту – школартту, оьрчIал багъру, ххуллурду. Ми цинярда давурттал ккаккан буллалиссар цуксса ххуй-хъин хьуну буссарив агьалинал оьрму. ЖучIара уттигу дур захIматшивуртту, мунийн бувну агьамсса хьхьичIуннайшивуртту хьуссар чин жущава хъанай ба­къар», – кунни Меликовлул.
Республикалул каялувчинал властьрал органнал бакIчитурайн тапшур бунни хъуннасса къулагъас дуллан агьалинал мюхтажшивурттах, тIалавшиннардах, аьркинлугъирттах.
– Аьркинссар ягу зун, ягу букьан къуллугъирттая. Цанчирча мукунсса ккаккиярттал инсантурал оьрмурдайн щавщи биян буллалиссар, – кунни Дагъусттаннал каялувчинал.
Сергей Меликовлул тIи­муний­ну, ХIукуматрал Председательнал сипталийну ххал бивгьуну бур МахIачкъалалив бакьин буллалисса Къорхъмасовлул цIанийсса кIичIиравалу.
– ХIакьину бувчIлай бур декабрьданул 15-ннийнин къуртал буван аьркинну бивкIсса реконструкциялул цалчинмур ятIап му чIумалнин бакIуйн къадуккантIишиву. На тапшур буллай ура Республикалул Счетрал палаталийн проектран харж дурсса арцу ххал дигьин ноябрьданул ахирданийннин, – кунни БакIчинал.
Ва ялагу, Сергей Меликовлул Контроль — финансирттал управлениялийн тапшур бунни мюнпатну харж дурну дурив ххал дигьин ДР-лул Минприродалул коммунал ххиличIрурду (ТКО) зана-кьала даврил мукьра проект бартдиргьусса бюджетрал арцу.
Гьашину Дагъусттаннай нацпроектру бартдигьаврил хIакъираву гьартану бувсунни ДР-лул ХIукуматрал председательнал цалчинма хъиривчу Нюсрет Оьмаровлул. Мунал тIимунийну, гьашину пландалий диркIсса 585 контрактрава чирчуну дур дурагу 70. Мунийн бувну бювкьурду бунни министерстварттайн ва цаймигу идарарттайн.
Цаймигу нацпроектру бартдигьаврил хIакъираву бувсунни миннуй каялувшиву дуллалисса вице-премьертурал.
– Аьмну нацпроектру бартдигьаврил хIасиллу жура дуванну 2021-ку шинал бюджет бартбигьлагьисса чIумал ва бищунну гьарца каялувчинал давурттансса кьиматгу», – кунни кьянкьану Сергей Меликовлул.