Ноябрьданул 15-нний Дагъусттаннал БакIчи Сергей Меликов гьуртту хьунни АьФ-лул ХIукуматрачIасса Аьрасатнал Федерациялий коронавирусрал инфекция ппив шаврищал талатаву дачин даврил Координациялул советрал президиумрал батIаврий. БатIаву хьунни Москавлив Михаил Мишустиннул каялувшиврий.
Ххал бивгьунни КОВИД-19 цIуцIаврищалсса талатаву дачин даврил, регионнайсса тагьардал, субъектирттан кумаг баврил ва аьмну билаятрал экономикалул масъалартту.
Михаил Мишустиннул тIимунийну, билаятрайсса тагьар чIурунура личIлай дур, амма цаппара регионнай къашавай хьуми чан хъанай бур. Цайми регионнай тIурча, къашавай хъанахъими ттигу чIявуну бур.
Федерал центрданул шайссаксса кумаг буллай бур регионнан. ХIукуматрал хъуннасса къулагъас дуллай дур регионну кислородрал щаллу баврих, азарханардавун дучIан дуллай бур дусса цинярда луртанну.
Билаятрайсса цIанасса тагьарданул хIакъираву ихтилатру бунни АьФ-лул цIуллушиву дуруччаврил министр Михаил Мурашкол ва АьФ-лул Роспотребнадзорданул каялувчи Анна Поповал.
Дагъусттаннайсса тагьарданул хIакъираву махъ лавхъунни Республикалул каялувчи Сергей Меликовлул. Мунал тIимунийну, октябрьданий хьусса коронавирусрайн къаршисса Оператив штабрай хьусса хIукмурду республикалий бартбигьлай бур. Амма эпидемиологиялул тагьар захIматнура личIлай дур.
«Ц1анасса ппурттуву азарханардай хъин уллай бур 2442 къашайшала, бур КОВИД-19 цIуцIаврил бувгьуссагу, миннавух – 41 оьрчI-бакI, 972 инсан къашавай ур тасттикь дурсса КОВИД-19 азарданул. Амбулаториялул шартIирдай хъин хъанай ур 1600 инсан. Республикалий бур дянивну лавсун билаятрал ва СКФО-рал регионнайнияр чансса къашайшалт, мукунма ливтIумигу. Дагъусттаннал азарханардай дузал бувну бур 3,1 азарва койка, миннувату 54% щаллуну бур кислородрал. Луртандалий бур 697 койка. Дагъусттаннал ХIукуматрал луртандалул фондравату итадаркьусса арцух лавсъссар 18 газификатор, 398 кислородрал концентратор, лавсунни мукунма тягач ва полуприцеп-цистерна», – кунни Сергей Меликовлул.
Республикалул каялувчинал бувсунни мукунма республикалий вакцинартту бувну бушиву 34,1% инсантурал, зий бушиву вакцинартту байсса 148 кIану.
Михаил Мишустиннул регионнал бакIчитурайн тапшур бунни КОВИД-19 азарданийн къаршисса давурттал ялув бацIан.
