ЦIуссалакрал райондалийсса Шушиннал школалун хьунни ххаллилсса бахшиш. Вайннан буллунни 32 оьрчIансса кIану бусса, спутниковый навигациялул оборудование ва тахограф дусса цIусса автобус.
Федерал бюджетрал харжлугърайн бувну вай гьантрай Дагъусттаннайн дуркIсса 116 транспорт республикалул 39 муниципалитетрайх дарчIуссар. Республикалул БакIчинал хъуннасса къулагъасрайн лавсун бур школарду уттизаманнул транспортрал дузал баврил масъалартту ва муницIун бавхIуну жула республикалийн уттигу дукIлантIиссар школардансса транспорт.
Школалул хIаятраву цIусса автобус кьамул буллалисса мажлис тIивтIунни Шушиннал школалул директор Шакират Абакаровал каялувшиннаралусса коллективрал.
– Школалун цIусса автобус пиш-каш баврия жу хъинну ххариссару. Утти школалийн ва школалия махъунмай оьрчIру мюхчанну биян буллансса сант ххишала хьуссар. Мукунма, оьрчIру конкурсирттайн, олимпиадарттайн, экскурсиярттайн ва цаймигу кIанттурдайн дайшишру дакъа биян буллан бюхъантIиссар. ДакIнийхтуну барчаллагьрай бура Дагъустаннал БакIчи Сергей Меликовлуйн, Республикалул КIулшивуртту дулаврил министерствалийн цIусса автобус булун кабакьу баврихлу, – увкунни Шакират Абакаровал.
