Ноябрьданул 16-нний Дагъусттан Республикалул ХIукуматрал председатель АьбдулпаттахI Амирхановлул каялувшиннаралу хьунни совещание. Ваний ххал бигьлай бия школардай дуклакисса оьрчIру украсса дукиялул щаллу баврийн багьайсса масъалартту.

АьбдулпаттахI Амирхановлул дакIнийн бувтуна, АьФ-лул Президентнал бигарду иширайну щаллу баврил лагрулий, ва шинал сентябрьданул 1-нния шийнмай дянивсса кIулшиву дуллалисса республикалул идарарттай 1-4-ми классирттал оьрчIан щаллу дуллалишиву кIирисса дукия. Жулла республикалун федерал бюджетрава хасну ва даврин ккаккан бувну бур 2, 3 млрд къурушрал.
Республикалул кIулшиву дулаврил ва элмулул министрнал буржру чIумуйну биттур буллалисса ЯхIия Бучаевлул бувсмунийн бувну, цIананин кIай арцува республикалул муниципалитетирттал кIулшиву дулаврил идарарттал бюджетирттавун тIайла бувну бур 1 млрд 694 млн къурушрал.
– Республикалул КIулшиву дулаврил ва элмулул министерствалул дурсса кIулшиву дулаврил идарарттал пищеблокирттал мониторинграйн бувну чIалан бивкIунни: 1396 идаралува 946-ннил бур бикIан аьркин­сса куццучIан гъан бувсса пищеблокру, 344-ннил – типовой­сса, 106-ннил – пищеблокирттан куну ижаралий (аренда) лавсъсса. Байбихьулул классирттал оьрчIансса дукиялул даража лавай баву мурадрай, «Развитие образования» тIисса республикалул госпрограммалувун ларсун дуссар школардал пищеблокру ва столовойрду баврил ва модернизациялул давуртту, – увкуна Я. Бучаевлул.