Хар-хавар бакъа ялун дир­сса захIматсса цIуцIаврища хха­ссал ан къавхьуну, кьадарданул жуятува батIул увунни Дагъус­ттан Республикалул лайкь хьусса энергетик, Кьадихъал тухумраясса МахIаммадлул ва Мадинатлул арс Кьадиев Саварби.
Саварби увну ур 1940-ку шинал ЧIяйннал шяраву. Школа къуртал бувну махъ захIматрал ххуллу байбивхьуну бур Каспийскаллал «Дагдизель» заводрай токарну. Совет Армиялуву къуллугъ бувну махъ дуклан увххун ур Фрунзе шагьрулийсса политехнический институтрал энергетический факультетрайн. Миву дуклай унува зун айивхьуну ур «Фрунзетеплосетьрай» аварийный группалул хъунаману.
1970-ку шиная шийнмайсса захIматрал ххуллу Саварбинал бавхIуну бур Дагъусттаннал энергетикалущал – Каспийскаллал ТЭЦ, «Чиркей ГЭС», «Дагэнерго», «Русгидро» – жаваблув­сса давурттай, отделданул начальникну.
Кьадиев Саварби Ккуллал райондалиясса хьхьичIа-хьхьичIсса гидроэнергетик-я. Саварби ххишала бакъа хъунмасса хIурматрай, бусраврай ва сийлий уссия архIал зузиминнаву ва мачча-гъанминначIа. Саварби ия цалла даву хъинну кIулсса, марцIсса, ккаккиялунну зузисса пишакар. Ванал даврин лавайсса кьимат бивщуну, дуллуссар «Ветеран гидро­энергетики РФ», «Заслуженный энергетик Дагестана» тIисса бусравсса цIарду, медаль «Ветеран труда», Дагъусттан Республикалул ХIукуматрал чулухасса ХIурматрал грамота ва цаймигу бахшишру.
Ккаккиялунну бувтссар цала кулпатращалсса оьрму, ва ба­къассагу, уссурваврал, ссил кулпатирттащалгу. Уссурвал ахиратрал шайхтурив Саварбинал миннал кулпатирттах аякьа хъиннура дурссия. Ва ия мачча-гъанначIа дакIнийхтуну ацIаву лахъсса инсан.
Саварбинан хъинну ххира­ссия Лакку кIану, буттал шяравалу, ччя-ччяни лагайссия Л­ккуйн.
Гьарца ишираву хьхьичIунсса, иминсса, ларайсса адаврал ва инсаншиврул увччусса, ссавур ду­сса, цума-цанналгу чIарав ацIан, ка-кумаг бан хIадурсса зунттал чув уссия ва.
Саварби аьпалухьхьун лагаврил кьурчIишиву кIидачIлай, дакIнийхтунусса жижара буллай буру кулпатрахь Къизахь, душнихь Мадинахь, ссихь Саниятлухь, уссур-ссуннал оьрчIахь, душварахь ва махъсса цинявппагу мачча-гъаннахь.
Цал рухI Алжаннул ххари даннав, бунагьирттал аьпа буваннав.
Гъан-маччами, чIахху-чIарах­ми ххирасса, хIалимсса, пиш тIий­насса Саварбинал чаннасса симан жула дакIурдива къагьантIиссар.

ЧIяйннал жяматрал цIания Шалласу Шалласуев