«Хъунмасса буруккин бикIай жула ниттил маз буруччаврил ялув»

«Хъунмасса буруккин бикIай жула ниттил маз буруччаврил ялув»

Имара Саидова

Саидова Имара Ах1мадлул душ

Бувну бур 1971-ку шинал ноябрь зурул 2-нний Хъусращиял шяраву.
Дагъусттаннал паччахIлугъ­рал университетгу къуртал бувну, зий бивкIссар Тахо-Годил цIанийсса Дагъусттаннал педагогикалул элму ахттар дай институтраву.
2005-ку шиная шинмай зий бур «Илчи» кказитрай корреспондентну.

1.Цукунсса хьуна оьрчIний вийнма яла гужсса асар биян бувсса зат, иш?

Цикссагу хьуна мукун­сса затру. Хъамакъабитай ва хъинну асар хьуна, шагьрулийн бувкIун, ттула ттатта Хъун МахIаммадащал, ванал цIакьсса гьалмахчу, лакрал шаэр, цIанихсса чичу, Ибрагьин-Халил Кьурбанаьлиевхъаннийн хъамалу лавгсса чIун.

2. Цими никирайн дияннинсса кIулли вин вила ппухълуннал нясав?

КIулли шанна никирайн дияннинсса.

3. Инсаннал хасиятраву винна яла ккарккун къаччимур лишан?
Лажин лякъаву, бусрав бакъашиву.

4. Вила оьрмулуву хьусса яла арши бакъамур шин?

Мукунсса хьунни 2003 шин, ттула язисса уссу дунияллия лавгсса.

5. Яла арши бумур шин?

Мунил хIакъираву, цукуннив, пикри бувну бакъара…

6. ВичIара циксса арцу хьувкун дигьаларгун дикIанссия вил дакI?

ТалихI арцу душивруву чIалай бакъар. Аммарив, арцугу хъинни, дакъанангу дулун, оьрмулиягу хIаз ласун.

7. Инсаннал тахсирдавасса цумур тахсир хьунссия вища багъишла битан?

Мюрщи-хъунисса тIул­дакъашивуртту ягу пикри бакъулий хьусса хатIа.

8. Бувагу къабитан?

Къааьйкьайсса инсан къаи­кIай, мунияту хIарачат буллан бикIара ялтту бучIан.

9. Ссан диял къашай вил чIун?

Ттул ниттин къаххирассия, чIун дакъар тIий, багьантту ляхълахъаву.

10. Бартлавгун ччисса вила шанма мурад?

Ттул ца мурад бур – инсантал цIуллуну-сагъну, дуниял паракьатну оьрму бутлай личIаву.

11. Вила оьрмулуву хъинну ххирасса кIантту бувгьусса шама инсаннал цIа?

Ттулла нину. Бур чIявусса кIицI лагансса цаймигу.

12. Винма ххуй бизайсса хъамитайпалул сурат?

Аьзизсса ниттил сипат.

13. Вина кьамулсса чув-адаминал сурат?

Ттула буттал наслулул, ХIу­сайнахъал, арсру.

14. Агарда бюхъайсса бивкIссания, инава ци кIанттай, ци чIумал бувну ва ци билаятрай яхъанай ччива вин?

Так нава бувсса кIанттай, нава бувсса чIумал.

15. Ссаяту бикIай вил яла хъунмур хIучI?

Лавмартшивриясса ва кьадаршивриясса.

16. Цукунсса дур вил виятурасса къарязишиву?

Ттула диялдакъашивурттая ччива цайминнал бувсун.

17. Яла къаххирамур дукра?

Ххирасса ва къаххирасса дукра личIи къадара.

18. Яла ххирамур дукра?

Дахьва ниттил кIарттува буккайхту, ккурчIав щябивкIун чIаххувращал нисирахун кIар­ттул ччатI букаву.

19. Хьуссарив вин вила оьрмулуву багъишла ритан къахъанахъи­сса къел?

Хьуссар пашман хьусса кIанттурду.

20. Лавгсса заманардавасса цIанихсса инсантуравасса цуманащал хьунабакьин ччива вин?

Дунияллия ччяни лавгсса ттула уссищал, бава-ттаттахъащал.

21. Цукунсса бур, вила пикрилий, лакрал миллатрал яла хъунмур буруккин?

Хъунмасса буруккин бикIай жула ниттил маз буруччаврил, ябаврил ялув. Ци чулийгу, ттул хъунмасса умуд бур чIярусса шиннардий яхьусса, авадансса тарих бусса лакрал миллатрал бучIантIимургу чаннасса бикIаншиврийн.

22. Ци дахчилай дур хIакьину Дагъусттаннахун, цил аьнтIикIасса кIанттун ва надирсса миллатран лавхьхьуну, ххуйнугу, ххаллилнугу ялапар хъананшиврул?

Биял хъанай бакъар жулва ппухълуннал бивкIсса кунмасса яхI-намус. Мунийн бувну ялун бучIантIимур лайкьсса шаврил цIаний чул бищун багьлай бур жула ххаллилсса тарихрайн.

Читайте также: