Ноябрьданул 24-нний МахIачкъалалив, Р. ХIамзатовлул цIанийсса Национал библиотекалий, хьунни Региондалул тIиртIусса визуал творчествалул ХIХ «Радуга» ва «Культура-онлайн» конкурсирттал хIасиллу дуллалисса батIаву.
«Радуга» конкурс дуллалиссар 2003-ку шиная шийннай ДР-лул Культуралул министерствалул ва Халкьуннал творчествалул къатлул, «Дагестан» ГТРК-лул чIаравбацIаврийну. Гьарцагу шинал ва конкурсрай, жулла республикалулминнацIун, гьурттушинна дувайссар Аьрасатнал регионнаясса телестудиярттал ва видеолюбительтурал. Вай шиннардил мутталий конкурсрайн дуркIун дур 800-ннийн дирсса давуртту.
Гьашинумур конкурсрайн дуркIун дур республикалул 15 муниципалитетраясса 36 видеофильм. Аьрасатнал регионная тIурча, гьуртту хьуну бур Свердловскаллал область, шагьру Красноуфимск ва Байкаловский район, шяравалу Вязовка. Ва ххуллухмур конкурс цурдагу хас дурну дур ДАССР-нул 100 шинан.
БатIаву дайдихьлахьисса ихтилат бувна культуралул министрнал хъиривчу, РДНТ-лул директор Марита МухIадовал. Цилва ихтилатраву ванил барчаллагь увкуна жюрилул члентурахь, дурсса хъуннасса даврихлу.
«Радуга» конкурсрал жюрилул председатель, «Дагестан» ГТРК-лул директорнал хъиривчу Ссалам Хавчаевлул цалвамур ихтилатраву кIицI лавгуна ялу-ялун ва конкурсрая цIу-цIусса инсантуран кIул хъанахъаврия цува ххарину ушиву.
Конкурсрайн гьан дурсса фильмрдан жюрилул кьимат бивщуну бия 7 номинациялий. «Лучший фильм» номинациялий цалчинсса кIану бувгьунни «Дагестан» РГВК-лул, ПатIимат Бурзиевал «Прогулка над бездной» фильмрал ва «Дагестан» ГТРК-лул, Назира Аьлиевал «Телепортация с Арсеном Серопяном» фильмрал.
«Культура-онлайн» конкурсрай гьурттушинна дурну дур 52 муниципалитетрал. Вайннува 20-нния лирчусса ххув хьуну дур «Веб-сайт», «Социальные сети», «Печатные и электронные СМИ», «Деятельность КДУ в системе АИС», «Мой Дагестан» номинациярттай.
Ххув хьуминнан буллунни ДР-лул Культуралул министерствалул чулухасса дипломру ва бахшишру.
