Октябрь зурул 27-нний МахIачкъалаливсса Дусшиврул къатлуву хьунни Дагъусттаннал паччахIлугърал университетрал Ниттил мазурдил центрданул ва Республикалул Национал политикалул ва динийсса иширттал министерствалул уртакьну итабавкьусса луттирдал презентация.
Министр Энрик Муслимовлул кIицI лавгунни Миннацрал мудангу кумаг бувайшиву Ниттил мазурдил центрданун элмийсса пособияртту, словарьду, оьрчIансса луттирду итабакьин, аьмсса мурадгу оьрчIан ниттил мазру лахьхьинсса кабакьу бувавугу духьувкун. Ниттил мазурдил центрданул директор, филологиялул элмурдал доктор Марина ХIасановалгу кIицI лавгунниниттил мазру машгьур буллалисса гьарцагу проектрацIун кабакьин хIадурну бушиву, центр хIасул хьусса ххюра шинал лажиндарай 27 лу итабавкьушиву, чIявуми луттирду Миннацрал кумаграцIух. Бувсунни луттирдал иллюстрациярдугу дагъусттаннал художниктурал дувайшиву, гьашину итабавкьусса «Рыжик» тIисса луттираву тIурчарив, оьрчIал дурсса суратру ишла дуршиву. Автортурал бувсунни цалва хIадур бувсса луттирдаяту. Филологиялул элмурдал кандидат Ххазина Аминовалгу бувсунни цилва хIадур бувсса «Словарь лакских пословиц и поговорок» тIисса луттирая. ЦIуну итабавкьусса луттирдавух бур А. Куртаевлул « Говорим по-кубачински», Фазил Дашлай тIисса чичул арснащал цачIу хIадур бувсса шанма мазрайсса (рутуллал, цIахъурдал ва оьруснал) «Рыжик». Презентациялий гьурттушинна дунни ДИРО-лул проректор, Аьрасатнал Чичултрал союзрал Дагъусттанналмур отделениялул ва Ккавкказуллал чичултрал клубрал председатель Миясат Муслимовал, ДГИ-рал профессор Асият Буттаевал, Ниттил мазрал ва литературалул учительтурал республикалул ассоциациялул председатель Зугьра Дибировал , Дагъусттаннал халкьуннал шаэр Космина Исрапиловал.
