Ниттил мазрал дарсирдаясса ихтилат

Ниттил мазрал дарсирдаясса ихтилат

Жамалуттин Оьмариев

Уттигъанну Вихьуллал школалул учительницал ттущал буллалисса ихтилатраву кIицI бувуна лакку мазрал дарсру хъинну чанну душиву школарттай. Ниттил мазрал дарс дишаврил тагьар цукун дурив кIул буван, на хьунаавкьуссияв Ккуллал райондалул КIулшиву дулаврил управлениялул хъунаманал хъиривчу Оьмариев Жамалуттиннущал.

  • – Жамалуттин, та байбишайссар школарттай лакку мазрал дарсру дихьлай?

– Ниттил мазрал дарсру жучIа дихьлай байбишай­ссар 1-мур классрава.

  • – Буккин-чичин ла­хьхьин байссарив оьрчIал багъирдаву?

– Буккин-чичин лахьхьин къабайссар. Амма сурат дишин, жанавартран, ичIаллил хIайвантран, тIабиаьтраву хьунадакьайми затирттал цIарду лахьхьин дувайссар. Цайминнащал цукун къуццу тIун аьркин­ссаривгу лахьхьин бувайссар.

  • – Цими дарс, ссят дикIайссар лакку мазрал дарсирдан хас дурну ца нюжмардул мутталий?

– Цалчинмур классрава байбивхьуну, 11-мур класс къуртал буваннин школарттай ца нюжмардул мутталий дикIайссар ниттил мазрал 3 дарс. Школарттал директортурал бюхъай­ссар вай 3 ссятрава 2 чичрулул, 1 литературалул ссятру дувангу, 2 литературалул 1 чичрулул дувангу. Шиккува кIицI буван ччива школарттал директортурахьхьун дуллуну душиву ялагу 7-нния 10-ннийн дияннинсса ссятру ца нюжмардул лагрулуву. Вай ссятру вайннаща бю­хъайссар дуклаки оьрчIал цумур дарсирал чулиннайсса кIункIу т1аву дурив, ми­ккун дулун. Жунма кIулли мукунма 11-мур класс къуртал буллалийни ЕГЭ-рдаву ­оьрус мазрал ва хIисавртталми чара бакъа дулун аьркиншиву. Мунияту чIявуми директортал ми дарсирдан ххи дуллан бикIай кIицI дурсса ссят­ру.
Жула ихтилат лакку мазрал дарсру дишаврия бухьувкун, аьркинну бур ца укунсса затгу хIисавравун ласун. ДГУ-раву хIадур буллай бур лакку мазрал дарсру дишайсса, жула мазрай­сса кказит-журналлай зун бю­хъайсса специалистал хIадур бувайсса факультет. Амма гайннал дакъар жула школарттащал­сса дахIаву. Га факультетрал зузалт занан аьркинни школарттайх. Буслан аьркинни, байбихьулул классирттава тIайла хьуну, учительтал ябитлан аьркиншиву литературалул чулинмайгу, цамур творчествалул чулинмайгу хъит тIисса оьрчIах. Ттун, масалдаран, махъсса 9-10 шинал янилун къаагьунни Ккуллал райондалийн зун увкIун кIицI бувсса факультет къуртал бувсса учитель. На ДГУ-рал факультет кIицI буварчагу, укуннасса дахIаву дикIан багьлай бур журналлал, кказитир­ттал редакциярттал, жула маз ахттар буллалисса институтир­ттал. Ми жучIанма букIлай, школарттайх занай бусларча лакку маз бухкъалаганшиврул муний дуллалисса чичрурдугу, маз ахттар буллалавриха зунмигу аьркинни тIий, му чIумал ххи дувангума хьунтIиссар кIицI дурсса ссятурдил ялун цаймигу. Анжагъ аьркинну бур, МахIачкъалалив кабинетирттаву щякъабивкIун, жучIанмагу «хъамалу» занан.
Жу гьарца шинах дувару ла­кку мазрал дарсру дишайсса учительтурал дянив яла ххуйма язи угьаврил конкурс. Бур жула учительтуравугу, оьрчIавугу Лакку билаят ххирасса, лакку мазрай лап ххуйну ихтилат буван, дакIниймур бусан шайсса оьрчIру. Анжагъ ми «бугьан» багьлай бур школа къуртал буваннин, жула мазрал ва миллатрал культуралул чулинмай бачин буван.

  • – Жамалуттин, барчаллагь вин дакIнийхтунусса ихтилат баврихлу ва жула лакку мазрал иш-тагьар цукун дуссарив бусаврихлу.

Читайте также: