Республикалул БакIчи Сергей Меликовлул каялувшиннаралу Дагъусттаннай хьунни «Русские ярмарки» тIисса ООО-лул инвестициялул проектру щаллу даврил хIакъиравусса совещание. Вай проектру дузал даврил агьаммур мурадгу бур республикалий инвестициярду хьхьичIуннай дан аьрщи ишла даву, проектру дузал даврийну инсантуран зунсса кIанттурду хьун баву. Кабакьу хьун тIий бур кIанттул производительнан билаятрал субъектирдал рынокрайн буккан. Му бакъассагу, ххуй хьун тIий дур агьалинал оьрмулул шартIру.
Совещаниялий ихтилат бунни «Русские ярмарки» ООО-лул каялувчи Ирина Дмитриенкол. Компаниялун мукьра проект дузрайн дуккан дансса пикри бур: МахIачкъалалив, Дарбантлив, ЦIуссалакрал ва Докузпариннал районнай.
ЦIуссалакрал райондалий бан дакIний бур «Нагорный» тIисса агропромышленностьрацIун бавхIусса Оптрал ва логистикалул центр. Мунин итадакьин тIий дур 137 гектар аьрщарал. Проект 280 миллиондалун дацIан тIий дур.
ХIакьинусса кьини Дагъусттаннай ярмаркалул комплексру бишинсса схемарду ва проектная документация щаллу дурну дур. Луглай бур партнертурах хIукуматрал ва цивппа заллусса организациярдаву. Проектру щаллу дуллан тIий бур 2022-2023-ку шиннардий.
