Азирбижаннал паччахIлугърал наградартту

Азирбижаннал хIукуматрал Аьрасатнавусса вакил Полад Бюль-Бюль- огълил ларгсса нюжмаркьини МахIачкъалалив Азирбижаннал паччахIлугърал наградартту дуллунни цIа ларгсса дагъусттанлувтуран: ДР-лул ПаччахIлугърал Советрал бусравсса председатель МахIаммадаьли МахIаммадовлун дуллунни орден «Достлуг» («Дружба»), СССР-данул халкьуннал артист Мурад Къажлаевлун буллунни Азирбижаннал Президент Илхам Аьлиевлул цIаниятусса диплом. Ва диплом залуннахьхьун булуншиврул, Полад Бюль-Бюль-огъли Дагъус­ттаннал БакIчи Сергей Меликовлущал архIал ивунни Мурад Къажлаев каялувчисса Республикалул Магъирлугърал школалийн.

– Хъунмасса барчаллагьри къулагъасрахлу ва дипломрахлу Азирбижаннал билаятрал хъуниминнан, ттул творчествалул ва магьирлугърал школалул даврин лахъсса кьимат бищаврихлу. Азирбижан ттун, буниялагу, хъуннасса планетар, – увкунни Мурад Къажлаевлул. Азирбижаннал посольстволул музейравун композиторнал буллунни 1993-ку шинал цачIанма ХIайдар Аьлиевлул чивчусса чагъар.
Сергей Меликовлулгу, Мурад Къажлаев барча уллай, увкунни: «Жува циняв Дагъусттаннай бавкьуну, нахIуну яхъанай буссару, магьирлугърал ишккаккултрал музыкалул, назмурдал ва балайрдалгу гъан буллалиссару. Дусшиву цIакь дуллалисса давриву Мурад Къажлаевлул ва Полад Бюль-Бюль-огълил биялсса бутIа буссар». Мурад Къажлаевлул творчествалун ва даврин бюхттулсса кьимат цалчин бакъар бишлашисса Азирбижаннал хъуниминнал. ДакIнийн бутанну, хьхьичIра Мурад Къажлаевлун дуллуну диркIшиву орден «Достлуг». Ва Азирбижаннал ва цайми билаятирттал дянив­сса арарду цIакь дуваврихлу дулайсса орден дур. Азирбижаннал ва Аьрасатнал музыкалул магьирлугъ хьхьичIуннай даврихлу лайкь хьуну ур композитор ва наградалун.

Ва кьини вара орден дуллунни МахIамадаьли МахIаммадовлунгу. Орден дуллалисса ппурттуву, барчаллагь тIий, ванал кIицI лавгунни цанна ва орден дулаву щалвагу Да­гъусттаннал халкьуннал хIурмат чIаххуврачIа лахъсса бушиврул барашинна дуллалисса иш бушиву.