Ларгсса тталаткьини «Дагестан» РИА-лий хьунни Дагъус­ттаннал делегациялул Къиргъизнавунсса аьрххилул хIасиллу дуллалисса пресс-конференция. Тихунсса делегациялул каялувчину ия Дагъусттаннал национал политикалул ва динийсса иширттал министр Энрик Муслимов. Ванал бувсунни аьрххилул мурад бивкIшиву, Дагъусттаннал агьлу Къиргъизнавун бизан бувну 85 шин хъанай духьувкун (1936 шинал бизан бувну бур), ва депортациялун хас дурсса мероприятиялий гьуртту шаву.’

Къиргъизнаву хIакьинусса кьини яхъанай ур Дагъусттаннаясса 15-20 азара инсан, Бишкекрая арх бакъа, мина дирхьуну бур цивппагу. Тайннаву чIявуми лазги, дарги, табасаран, агъул ва ярусса бур. «ЧIярусса шиннардил мутталий репрессиярттал щатIахьхьун биривсса Дагъусттаннал наслулун цивппа ватандалий хъамава бивтсса кунма бивкIру, Дагъусттаннал цIанасса хъунама Сергей Меликовлул тапшур бувну, жу тихун бучIаврия хъинну рязийну бия, Къиргъизнал ва Дагъусттаннал хIала-гьурттушиврийсса арарду цIакь дувансса умудрай, хъиндайдихьу дурссар тIий бия. ЧIярусса захIматшивуртту духIан багьарчагу, тайннал да­гъусттаннал культура, аьдатру ядурну дия. Шанма миннат бия тайннал хьхьичIххуттайн лавсъсса: ниттил мазурдийсса учебникирттал кумаг бувара, ни­ттил мазурдил дарсру дихьлансса учительтал хIадур буван кумаг бувара ва МахIачкъалалия Бишкеклив самолётру лехлахи дувансса хIарачат бувара тIисса», – увкунни Энрик Муслимовлул. Ванал чIурчIав дунни Дагъусттаннал делегация хъинну ххуйну, хIурматрай хьунабавкьушиврий ва Чуйская областьрал губернатор Эркин Тентишевлущалсса, Къиргъизнал муфтий Замир Ракиевлущалсса хьунабакьавурттайгу кIирагу республикалул агьалинан мюнпатсса хIала-гьурттушивриясса ихтилатру хьушиврий. Да­гъусттаннал диаспоралущалсса хьунабакьавурттаву тIурчарив, ца яла дакIний личIанмур хьуну дур дагъусттандуш Майя АьбдурахIмановал каялувшиву дуллалисса Октябрьскаллал школалул коллективращал­сса хьунабакьаву. Директорнал бувсмунийн бувну, школалий дуклай ур 2000 дуклаки оьрчI, миннавату 480 ур Дагъусттаннаясса. Аьркинну бур ниттил мазурдийсса учебникру. Къиргъизнал КIулшиву дулаврил министерствалущал икьрал дурну дур Дагъусттаннал делегациялул, учебникиртталгу кумаг буван, Дагъусттаннал школарттал преподавательтурал онлайн журалийсса дарсругу дихьлан. Конференциялий тIайланнасса эфирданийн бувккунни Дагъус­ттаннал делегациялийн тихун оьвкусса ва тийхсса мероприятиярттай чялишну гьурттушинна дурсса дагъусттандуш Зумрият Резаханова, «Зита ва Гита» тIисса фондрал хъунмур. Да­гъусттаннал агьалинан ва кIулссар машгьурсса сиам-кIинничалт Зитал ва Гитал нину хIисаврай. «ЧIярусса шиннуя ттул Дагъусттаннал делегациялущал жучIава хьунабакьинсса хияллай. Ниттил хавардайн бувну, ттун кIулли анавархъиндарай мина даххана дуван багьсса агьалинан ччаннай бацIаннин циксса ккавкссарив. Жу оьккину бакъару, ахчайсса акъар, ихтиярду ссуссукьу дуллалисса кIантту ба­къар. Амма тарихийсса ватандалущал дахIаву дуван ччай бивкIру, Дагъус­ттаннал мархри бухьувкун жувува. ТIайламур бусан, на вих бакъа бивкIра Дагъусттаннал делегация бучIанссар тIий. Жул хIурмат бувну бувкIунни, жунгу асар хьунни бучIаву. Гихуннайгу дусшиврийсса арарду цIакьгу, куртIгу хъананхьуви тIисса умудрай бура», – увкунни ванил. Дагъусттаннал делегациялувух ивкIсса МЧС-рал вакил Жамбулат Маллаевлул бувсунни цивппа багьшиву, тай бала­сса чIуннардил барану хь­усса , 95 шинал оьрмулувусса хъуначувнал ужагърайн.Танал був­сшиву цивппа шатрал бувцIусса, зат дакъасса авлахърайн багьшиву. Сагъну личIаншиврул, аьрщарал лув къувирду дуклай, землянкарду бувну яхъанан багьшиву, гуж-балагь ххассал хьушиву. Ва яла-яларив, бизан бувми, ватандалух ххуцI бувккун, мякьну бивкIшиву, гьамин ватандалухсса ччаврил Дагъусттаннал мазру, аьдатру, культура, цалагу ядурну, наслулунгу лахьхьин дувансса хIарачатрай къуццу тIий бивкIшиву. Бувсунни тийхсса мероприятиярттай ниттил мазурдийсса балайрду тIий, лезгинкалий къавтIий бивкIшиву Дагъусттаннал наслу, цавувагу гъурбатрай бусса кунмасса асар къабивкIшиву. «Дагестан» РИА-лул хъунама МахIаммад МахIаммадовлулгу Къиргъизнавусса Дагъус­ттаннал агьлу миллатирттал кказитру, журналлу ккалансса чаран лякъинмур буванну увкунни. Къиргъизнавусса Да­гъусттаннал агьалинаву лакгу бурив тIисса суал булун ччай бунува, цаламур миллатрал буруккин хьхьичIунну бур учинссар тIий, булун къасивсунна нагу. Амма тихун лавгсса делегациялул вакилтуращал личIину хьунабавкьуну, цIухху-бусу бувну, зухьгу бусан махъ буллай бура. Лак бакъасса мурцIу дунияллул гъунттуй бушиву къакIулли. БикIантIиссар Къиргъизнавугу! ­