Ноябрьданул 22-нний Дагъусттаннал БакIчи Сергей Меликовлул каялувшиврий хьунни республикалул властьрал органнал ва муниципал сакиншиннардал каялувчитуращалсса агьамсса масъаларттал хIакъиравусса батIаву.
Агьалинай КОВИД-19 цIуцIаврийн къаршисса вакцинартту баврил, азар хъин дансса дарурттал луртан дузал даврил хIакъираву махъ лавхъунни Дагъусттаннал цIуллушиву дуруччаврил министр Татьяна Беляевал. Мунил тIимунийну, республикалий хIадур бувну бур сайки 3000 койка, микку хъин буллай бур 2300-ха ливчусса къашайшалт. Реанимациялул отделениялий ур сайки 200 инсан. Илкинну бур ттигу 19% койкардал.
ЦУР-данул (Центр управления регионом) ларгсса нюжмардий ххал бигьин хIадур бувсса масъаларттал хIакъираву республикалул каялувчинал бувсунни миннувасса чIявуми ччясса мутталий чулийн буккан буван къабюхъан тIий бушиву. Ми масъалартту дузрай буккан буваншиврул, Сергей Меликовлул тIимунийну, аьркинни давуртту лавайсса даражалий бартдигьаврил низам. Му жучIара ттигу аьй дансса даражалий дур. Му тагьар даххана дуван аьркинну дур. ДР-лул ЦУР-данул каялувчи МахIаммадсултан Аьбдуралимовлул тIимунийну, ларгсса нюжмардий ва идаралул кьамул дувну дур сайки 5500 лабизаву. Ва ххуллух гьарза хьуну дур къатри гъили баврицIун дархIусса лабизавуртту.
