Сайки мукьцIалла шинал мутталий дуккаврил аралуву зий, захIмат буллай ивкIун ур къумукьнал миллатрал лайкьсса вакил, ХIамидлул арс Халит Магидов. Миннува 18 шинай ва зий ивкIун ур Дагъусттаннал просвещениялул министрну. Зий ивкIун ур мукуна цал Хасавюртуллал шагьрулул исполкомрал, яла МахIачкъалаллал шагьрулул исполкомрал председательну.
Увну ур Халит Магидов 1926-кусса шинал Хасавюртуллал райондалийсса Яхсайннал шяраву. Ппу ивкIуну ур Халитлун дурагу 10 шин дусса чIумал, мунийн бувну ванал оьрчIшивугу бигьасса къархьуну дур. Амма гиччава най уна итххявхсса оьрчIал, сивсуну оьрмулул ххуллийнгу увккун, бивтун бур дахIалай чинну оьрмулулгу, захIматралгу ххуллу. Бувккуну бур Дагъусттаннал паччахIлугърал педагогикалул институт, къуртал бувну бур ЦК КПСС-рал Лахъсса школа, дурурччуну дур тарихрал элмурдал кандидатнал диссертация.
ЗахIматрал ххуллу байбивхьуну бур Хасавюртуллал консервардал заводрая. Муния махъ зий ивкIун ур учительну Яхсайлив, Хасаврай, вава шагьрулул райОНО-рай, горкомрай. Цала бюхъулийну гьазгу хьуну ур ялув кIицI бувсса къуллугъирттайн ияннин. Аьпалухьхьун лавгун ур 1996-ку шинал, оьрмулул 70 шинаву.
Халит Магидовлул хIалал дурну дур диялсса орденну ва медаллу. Ванал цIанийсса кIичIиртту бур Хасавюртлив ва МахIачкъалалив. Ванал цIа дирзун дур буттал шяраву Яхсайливсса школалунгу.
Октябрь зурул 25-нний ХIамидлул арс Халит Магидов увну бартларгунни 95 шин.
