Ноябрьданул 8-нния декабрьданул 10-ннийнин хьунтIиссар «Культурный марафон» тIисса Щалагу Аьрасатнал акция. Ва шамилчинни жучIара хъанахъисса. Гьашинумур акция хас дуллалиссар билаятрал киноиндустриялуву хъанахъисса агьамсса иширан – жулва билаятрай цалчинсса киносеанс дурну 125 шин шаврин.
Проектрал сакиншинначиталну бур Аьрасатнал Культуралул министерство, Аьрасатнал КIулшиву дулаврил министерство ва Яндекс.
Акциялул сиптачитурал агьаммур мурад дуклаки оьрчIал кIулшивуртту гьарта-гьарза давур, хасну гьашинумур мурадрив – оьрчIру кинорал тарих лахьхьаврихух гьан баву, кинорацIун бавхIусса ихтилатирттавух гьуртту хъанахъи баву.
Проектрал лагрулий дуклаки оьрчIаща бюхъантIиссар цанмагу хIаз бизансса онлайн-тестру щаллу буван, ва мунийну ххуйну кIул хьун школ программалуву къалахьхьайсса искусствалущал. ОьрчIал оьрмулул шиннах бурувгун хIадур бувну бур мультимедий журалул тестру цивппагу. Тест щаллу буван бюхълай бур 15-25 минутIрал дянив. Мукунма оьрчIаща бюхъантIиссар кинорацIун цал цIарду цIакьну дархIусса пишакартуращал кIул хьун, цалва-цалва школалий киноклубру сакин буван ва мини-фильм сакин давривусса цалва бюхъу-гьунарду ххал буван. Дуклаки оьрчIансса тестру хIадур бувну бур КиноПоискрал экспертътурал Яндексрал кIулшиву дулаврил проектирдал методистътуращал ва экспертътуращал цачIу.
«Культуралул марафондалий» гьуртту хьуншиврул, регистрация дуван аьркинссар ва ссылкалий: http://education.yandex.ru/cuIture.
Проектрал давривух гьуртту хьун бюхъайссар ччиманаща – учительтураща, дуклаки оьрчIаща ва вайннал нитти-буттаща.
Проектрай ххув хьусса 100 учительнан ва 500 дуклаки оьрчIан дулунтIиссар бахшишру.
Цалчинсса «Культуралул марафон» хьуссар 2019-ку шинал, ттизаманнул культуралул дунияллун хасну. Му шинал проектрай гьурттушинна дурссар 590 азара дуклаки оьрчIал ва 8 азарунния ливчусса учительтурал. 2020-ку шиналмур проектрай гьуртту хьуссар 860 азара дуклаки оьрчI ва 28 азара учитель. Му шиналмур марафон хьуссар Аьрасатнал халкьуннал культуралун хасну.
