Аьрасатнал хIакин-инфекционист Евгений Щербина цалва Инстаграм-аккаунтрай, цаппара билаятирттал иш-тагьар хIисавравун ларсун, коронавирусрал азарданун так вакцинардал ххуллу кьукьинтIишиврия буслай ур.

Ванал бувсмунийн бувну, пандемиялул шамилчинсса шинни щаллагу дунияллий цIусса штамм, ххишалану заралсса ва ччяни лахъайсса «Дельта», ппив хъанай. СНГ-лул билаятирттай азарханарду вирусрал къашавайминнал бувцIуну бур. ЧантI кусса билаятирттайрив агьалинал 50 %, кув билаятирттай ххишалассагума, прививкартту дурну дур. Прививкартту дурминнал 70 % агьалинал захIматну къашай къахьунтIиссар, 90 % бивкIулуща ххассал буллалиссар тIий ур хIакин. «Агар ца инсаннал прививка дурну духьурча, хъинни, ххуйри, цинявннал прививкартту дуварчаннив вирус цанная гаманайн къалахълахъиссар, вирусрал миграция дацIлацIиссар, цIусса къашайшалт ялун къаличлачиссар. Вакцинарду бувминнал дянив вакцина къабувма цува С ва Д витаминнал хха­ссал увантIиссара тIий ухьурча, му нахIакьданни мукунсса тамахIрай усса. Вирус дирчIаншиврул агьалинал 70 % вакцина дуван аьркин­ссар. Нанияра, ччяни вирус духлаганширул, циняв архIала къашай хьун бацIаннуча тIутIимигу бяйкьлакьимири, цал къашай хьуманал иммунитет мунийну цIакь хъанай дакъатIий, инсан ялагу, ялагу къашай хъанай унутIий. Укунсса тарап дургьуми сававну, инсантал хха­ссал къахъанай буну тIий бивкIуллул ххяппурттаща. Ласурча Израиль, тайнначIа кIивагу доза бувсса агьалинал 62 % бур. Израильнавугу къашавайми ялун личлай бур, амма чIявусса инсантал литIлай бакъар. Мукунма вакцинарду бувминнал аьдад хъунисса билаятирттай чан хъанай дур. Великобританиянаву, Германиянаву чIявусса бур къашайшалт, амма литIлатIиминнал ккал-аьдад ццах бутлатисса да­къар. Даниянаву 75 % агьалинал дурну дур прививкартту, къашай хьуминнава чан-кьансса литIлай бур. Португалиянаву сайки 86 % прививкартту дурну дур, инсантал тийх бувагу литIлай ба­къар. «Дельта» штаммгу ппив хьуннинма бухлаган бувну бур. Аьрасатнаву прививкартту дурну дур 32, 9 % агьалинал, миннаватугу бачIиннал къалпсса сертификатру ларсун дур. ЛитIлатIиминнал аьдадгу ццах бутлатисса дур. Му къагьану, хъинну нигьа бувсун бур цIусса штамм ппив къахьун. Зун кIуллив цIусса штамм сукку шайшиву къашай хъанахъими чIяву хъанан бикIайхту? Вирусрал мутация хъанахъиссар къашай хьуми гьарза шайхту», – тIий ур хIакин. Мунихлуну ва маслихIат буллай ур, кIихIулла къахъанай, прививкар­тту дувара, бакIрай бавцIуну, жулва билаятрал агьулданул лябуккулий прививкартту дуварча, жувагу ва балаллува буккан бюхъайссару, хIакьину яла цамур ххуллу бакъа­ссар жунма тIий.